Raqobat qo‘mitasi bank xizmatlari reklamasida qonunbuzilishlarni aniqladi

Toshkent, O’zbekiston (UzDaily.uz) — Raqobatni rivojlantirish va isteʼmolchilar huquqlarini himoya qilish qo‘mitasi moliyaviy xizmatlar reklamasi to‘g‘risidagi qonunchilik talablarini buzgani uchun qator tijorat banklari va mikromoliya tashkilotlariga nisbatan ish qo‘zg‘atdi. Bu haqda idora matbuot xizmati xabar qildi.

Qo‘mita maʼlumotlariga ko‘ra, ijtimoiy tarmoqlar, internet va ommaviy axborot vositalarida qonunchilik talablarini buzgan holda tarqatilayotgan reklama materiallarining salmoqli qismi aynan moliya sohasiga to‘g‘ri keladi. Idoraning taʼkidlashicha, bunday reklamalar ko‘pincha ishonchsiz yoki isteʼmolchilarni chalg‘ituvchi maʼlumotlarni o‘z ichiga oladi.

Xususan, omonatlar va kreditlar reklamasida ko‘p hollarda foiz stavkalari, mijozlar uchun minimal talablar hamda takliflarning amal qilish muddati haqidagi maʼlumotlar keltirilmaydi. Qo‘mita qayd etishicha, mikrozaymlar reklamasida esa vositachilik, sug‘urta va boshqa majburiy to‘lovlar ko‘pincha ochiqlanmaydi. Bundan tashqari, ayrim reklama beruvchilar mahsulotlarning muhim shartlarini juda qisqa, noaniq yoki qabul qilish qiyin bo‘lgan shaklda bayon qiladi.

Idora, shuningdek, reklamada ikki maʼnoli iboralar, mubolag‘alar, shuningdek, boshqa tashkilotlarning tovar belgilari va nomlari bilan bog‘liq so‘zlar hamda belgilardan foydalanish holatlarini ham aniqladi. Qo‘mita fikricha, bunday amaliyot isteʼmolchilarning moliyaviy mahsulotlar haqida to‘liq va ishonchli axborot olish huquqini buzadi.

Qo‘mita «Reklama to‘g‘risida»gi qonunning 43-moddasiga muvofiq, reklama beruvchilar moliyaviy xizmatlar ko‘rsatish bo‘yicha shartnomalarning muhim shartlarini oshkor qilishi shartligini, shuningdek, isteʼmolchilarning ishonchini suiisteʼmol qilish va ularning tajribasi yoki bilimlari yetishmasligidan g‘arazli maqsadlarda foydalanish taqiqlanganini eslatdi.

Idora maʼlumotiga ko‘ra, so‘nggi vaqtlarda reklama to‘g‘risidagi qonunchilik talablarini buzgani uchun 20 dan ortiq tijorat banklari va mikrokredit tashkilotlariga nisbatan moliyaviy sanksiyalar qo‘llanilgan.

Qo‘mita bozor ishtirokchilarini moliyaviy xizmatlar reklamasida taklif shartlarini yashirin matn, o‘qish qiyin bo‘lgan mayda shrift yoki maʼlumotlarni qabul qilishni qiyinlashtiradigan ranglardan foydalanmasdan, to‘liq, ishonchli, tushunarli va ochiq shaklda taqdim etishga chaqirdi.