Qurilish vazirligi boshqaruv kompaniyalari nazoratini izohladi

Toshkent, O’zbekiston (UzDaily.uz) — Qurilish va uy-joy kommunal xo‘jaligi vazirligi uy-joy mulkdorlari shirkatlari hamda ko‘p kvartirali uylarni boshqaruvchi tashkilotlar faoliyati ustidan davlat nazorati choralari bo‘yicha tushuntirish berdi.

Bunga ijtimoiy tarmoqlarda qabul qilinayotgan choralar asossiz ekani va boshqaruv tashkilotlari faoliyatini cheklayotgani haqidagi tanqidiy materiallar sabab bo‘ldi.

Vazirlikda taʼkidlanishicha, davlat nazoratining maqsadi uy-joy mulkdorlari shirkatlari va boshqaruv tashkilotlari faoliyatini cheklash emas, balki qonunchilik talablariga rioya etilishini taʼminlash, uy-joy kommunal xizmatlari sifatini oshirish hamda xonadon mulkdorlarining huquqlarini himoya qilishdan iborat.

Shu munosabat bilan qonunchilikni qo‘pol yoki muntazam ravishda buzib kelayotgan tashkilotlarga nisbatan qonunda nazarda tutilgan taʼsir choralari qo‘llanilmoqda.

Qurilish va uy-joy kommunal xo‘jaligi sohasini nazorat qilish inspeksiyasi maʼlumotlariga ko‘ra, 2026 yil yanvar–may oylarida Toshkent shahri hududiy inspeksiyalari tomonidan ko‘p kvartirali uylarni boshqarish qoidalarini buzish bilan bog‘liq 220 ta holat aniqlangan.

Qonunchilik talablarini muntazam ravishda buzgan 37 ta uy-joy mulkdorlari shirkatlari, 28 ta boshqaruv tashkilotlari va uylarni bevosita boshqarishni amalga oshiruvchi 5 ta tashkilotga nisbatan tegishli choralar ko‘rilgan.

Vazirlik eng ko‘p uchraydigan qoidabuzarliklar qatorida sutka davomida ishlaydigan avariya-dispetcherlik xizmatining mavjud emasligi, «Mening uyim» axborot billing tizimidan foydalanilmasligi, xonadon mulkdorlariga hisobot taqdim etilmasligi hamda ko‘p kvartirali uylarda texnik tekshiruvlar o‘tkazilmasligini qayd etdi.

Idora eslatishicha, Vazirlar Mahkamasining 2022 yil 1 fevraldagi 47-son qarori bilan tasdiqlangan nizomga muvofiq, boshqaruv tashkilotini elektron reyestrdan chiqarishga faqat qonunchilikda belgilangan asoslar mavjud bo‘lgan taqdirdagina yo‘l qo‘yiladi.

Vazirlik, shuningdek, qonunchilikda ko‘p kvartirali uylarni boshqarishning biror shakliga nisbatan cheklovlar belgilanmaganini taʼkidladi. Davlat nazorati tanlangan boshqaruv modeliga qaramasdan amalga oshiriladi va barcha subyektlar tomonidan qonun talablariga rioya etilishini taʼminlashga qaratilgan.

Idora maʼlumotlariga ko‘ra, qoidabuzarliklarning aksariyati fuqarolar murojaatlari asosida o‘tkaziladigan joyiga chiqqan holdagi tekshiruvlar davomida aniqlanadi. Shu munosabat bilan vazirlik aholini boshqaruv tashkilotlari faoliyatidagi qoidabuzarliklar haqida «Mening uyim» mobil ilovasi orqali xabar berishga chaqirib, jamoatchilik nazorati ko‘p hollarda davlat nazoratiga nisbatan samaraliroq bo‘lishini taʼkidladi.