Oʻzbekiston va Serbiya qishloq xoʻjaligi sohasidagi hamkorlikni rivojlantirmoqda

Toshkent, O’zbekiston (UzDaily.uz) — 17–21-avgust kunlari Serbiyada sublimatsiya usulida quritilgan mevalar va quritilgan olxo‘ri ishlab chiqarishga ixtisoslashgan O‘zbekiston kichik va o‘rta biznes vakillarining ishchi tashrifi bo‘lib o‘tmoqda. Tashrif Xalqaro savdo markazi (ITC) tomonidan Trade Promotion East dasturi doirasida O‘zbekiston Respublikasi Investitsiyalar, sanoat va savdo vazirligi ko‘magida tashkil etilgan.

Mazkur dastur mahalliy ishlab chiqaruvchilarning texnologik va eksport salohiyatini oshirishga qaratilgan. Asosiy e’tibor sublimatsion quritish, quritilgan olxo‘ri ishlab chiqarish, hosilni yig‘ib olgandan keyingi qayta ishlash, sifat nazorati tizimlari, qadoqlash va brending masalalariga qaratilmoqda.

Dastur Belgradda Serbiya Savdo-sanoat palatasidagi uchrashuv bilan boshlandi. Unda eksportga yo‘naltirilgan qishloq xo‘jaligi ishlab chiqarishlarini rivojlantirish, korxonalar, tarmoq birlashmalari va davlat institutlari o‘rtasidagi hamkorlik tajribasi taqdim etildi. Keyingi bosqichda o‘zbekistonlik tadbirkorlar Serbiyaning yetakchi kompaniyalari va ilmiy tashkilotlari, jumladan, Zafruit, FRIKOS, ELBI (LyoCake), Podgorina Fruct, Jovanović Voće, Processing TM, Agro Corp Duo hamda Chachakdagi Mevachilik instituti faoliyati bilan tanishmoqda.

Ishlab chiqarish va ilmiy-tadqiqot maydonlarida mevalarni quritish va qayta ishlashning zamonaviy texnologiyalari, sifat nazorati tizimlari, qadoqlash yechimlari hamda tashqi bozorlarga yetkazib berishni tashkil etish amaliyoti o‘rganilmoqda. Ekspert sessiyalarida esa oziq-ovqat xavfsizligi, innovatsiyalar va mahsulotning qo‘shilgan qiymatini oshirish bo‘yicha tavsiyalar berilmoqda.

Olingan bilim va tajriba keyingi tijorat faoliyati bilan bevosita bog‘langan. 22-avgust kuni Zagrebda va 24-avgust kuni Lyublyanada importyorlar hamda distribyutorlar bilan B2B uchrashuvlar o‘tkazilishi rejalashtirilgan. Ularda O‘zbekiston kompaniyalari o‘z mahsulotlarini taqdim etib, yevropalik xaridorlarning talablarini muhokama qiladi hamda yangi xorijiy bozorlarga chiqish imkoniyatlarini ko‘rib chiqadi.

Shu tariqa, mazkur missiya korxonalarning texnologik rivojlanishini yangi hamkorlar va savdo kanallarini izlash bilan uyg‘unlashtiradi. Bu O‘zbekiston meva-sabzavot mahsulotlarining raqobatbardoshligini oshirish, zamonaviy ishlab chiqarish yechimlarini joriy etish hamda O‘zbekiston va Serbiya o‘rtasidagi amaliy iqtisodiy hamkorlikni mustahkamlash uchun qo‘shimcha imkoniyatlar yaratadi.