O‘zbekistonda Workmall agentligi faoliyati tugatildi

Toshkent, O‘zbekiston (UzDaily.uz) — O‘zbekistonda fuqarolarni xorijda ishga joylashtirish xizmatlarini ko‘rsatib kelgan “Workmall xususiy bandlik agentligi” MCHJ faoliyati tugatildi.

Tegishli qaror kompaniyaning 2026 yil 10 maydagi arizasi asosida qabul qilingan bo‘lib, natijada 2024 yil 1 yanvarda 215300 raqami bilan berilgan litsenziya bekor qilindi.

Xabar qilinishicha, “Xususiy bandlik agentliklari to‘g‘risida”gi Qonunga muvofiq, litsenziya amal qilishi to‘xtatilganidan keyin kompaniyaga O‘zbekiston Respublikasi fuqarolarini xorijda ishga joylashtirish xizmatlarini ko‘rsatish taqiqlanadi.

“Workmall xususiy bandlik agentligi” faoliyati bilan bog‘liq murojaat yoki shikoyatlarga ega fuqarolarga ularni joriy yil 30 mayga qadar Migratsiya agentligiga yuborish tavsiya etildi. Murojaat uchun 71 202 33 55 raqami, shuningdek, 171 va 711 qisqa raqamlari ham ko‘rsatilgan.

Qaror fuqarolar huquqlarini taʼminlash, xorijda ishga joylashtirish bozoridagi faoliyatni tartibga solish va ehtimoliy murojaatlarni belgilangan tartibda ko‘rib chiqishga qaratilgan.