O‘zbekistonda OTMga kirish imtihonlari sanasi eʼlon qilindi

Toshkent, O’zbekiston (UzDaily.uz) — O‘zbekistonda 2026–2027 o‘quv yili uchun davlat oliy taʼlim va professional taʼlim muassasalariga o‘qishga kiradigan abituriyentlar uchun kirish test sinovlarini o‘tkazish muddatlari belgilandi. Imtihonlar 14 iyuldan 23 iyulgacha bo‘lib o‘tadi.

Test sinovlari to‘qqiz kun davomida har kuni ikki smenada tashkil etiladi. Birinchi smena soat 08:00 da, ikkinchi smena esa soat 15:00 da boshlanadi.

Abituriyentlarga imtihon o‘tkaziladigan joyga boshlanishidan kamida bir yarim soat oldin yetib kelish tavsiya etilmoqda. Test sinoviga kirish ruxsatnomasini my.uzbmb.uz sayti orqali olish, so‘ngra uni yuklab olish va chop etish lozim.

Tashkilotchilar taʼkidlashicha, har bir ishtirokchi faqat ruxsatnomasida ko‘rsatilgan joyda, belgilangan kunda va belgilangan smenada test sinovidan o‘ta oladi. Imtihon sanasi, vaqti yoki o‘tkazilish joyini o‘zgartirish nazarda tutilmagan.

Test sinovida ishtirok etish uchun abituriyentlar o‘zlari bilan pasport yoki ID-karta, shuningdek, chop etilgan ruxsatnomani olib kelishlari shart. Pasport nusxasi yoki boshqa hujjatlarni taqdim etgan, shuningdek, imtihon boshlanishiga kechikkan ishtirokchilar test sinoviga qo‘yilmaydi.