Toshkent, O‘zbekiston (UzDaily.uz) — 2025 yil 11 martdan boshlab O‘zbekistonning bir qator daryo va suv havzalarida baliq ovlash vaqtinchalik taqiqlanadi. Cheklovlar O‘zbekiston Respublikasining №627 «Ovchilik va ovchilik xo‘jaligi to‘g‘risida»gi Qonuni hamda 2024 yil 9 fevralda qabul qilingan Vazirlar Mahkamasining №80 qaroriga muvofiq joriy etilgan.

Yangi qoidalarga ko‘ra, 11 martdan 31 maygacha Amudaryo va Sirdaryo daryolarida baliq ovlash to‘liq taqiqlanadi. 26 apreldan 10 iyungacha cheklovlar Qoraqalpog‘iston Respublikasi va Xorazm viloyatidagi tabiiy suv havzalariga taalluqli bo‘ladi. Bundan tashqari, 16 apreldan 31 maygacha mamlakatning barcha tabiiy suv havzalarida baliq ovlash man etiladi.

Ko‘rsatilgan davrlar baliqlarning nasl berish (nerest) mavsumiga to‘g‘ri keladi, bu paytda ular eng nozik va himoyaga muhtoj bo‘ladi. Ushbu davrda ov qilish populyatsiyaning keskin kamayishiga olib kelishi va ayrim turlarni yo‘qolib ketish xavfi ostiga qo‘yishi mumkin. Hukumat bu chora-tadbirlar ekologik muvozanatni saqlash va suv bioresurslaridan barqaror foydalanish uchun zarurligini taʼkidlamoqda.

Taqiq sunʼiy suv havzalari, irrigatsiya tarmoqlari va sadok xo‘jaliklarida intensiv baliqchilik hamda akvakulturaga tatbiq etilmaydi. Bu tabiiy ekotizimlarga zarar yetkazmagan holda sanoat miqyosida baliq yetishtirishni davom ettirish imkonini beradi.

Qonunbuzarlik uchun javobgarlik

Belgilangan muddat va hududlarda baliq ovlash qoidalarini buzgan shaxslar maʼmuriy va jinoiy javobgarlikka tortiladi. Taqiqqa rioya etilishini tegishli davlat organlari nazorat qiladi.