Toşkent, Özbekiston (UzDaily.uz) — O‘zbekiston qurilish va uy-joy kommunal xo‘jaligi vaziri Sherzod Hidoyatov Markaziy Osiyo mamlakatlari va Xitoy bilan hamkorlikni rivojlantirish bo‘yicha oltita tashabbusni taqdim etdi. Ular Bishkek shahrida bo‘lib o‘tgan «Markaziy Osiyo – Xitoy» qurilish vazirlarining ikkinchi konferensiyasida ilgari surildi. Bu haqda O‘zbekiston Qurilish va uy-joy kommunal xo‘jaligi vazirligi xabar berdi.
Vazirning so‘zlariga ko‘ra, so‘nggi to‘qqiz yil davomida O‘zbekistonda 15 mingta ko‘p kvartirali uy foydalanishga topshirilgan bo‘lib, ularda 715 mingdan ortiq xonadon tashkil etilgan. Qurilgan bino va inshootlarning umumiy maydoni 288 million kvadrat metrdan oshgan.
Hozirgi vaqtda qurilish bosqichida bo‘lgan obyektlarning umumiy maydoni 218 million kvadrat metrni tashkil etadi. Ularda 771 mingdan ortiq xonadon qurilishi ko‘zda tutilgan.
Bundan tashqari, qurilish sohasida 420 ta shaharsozlik normasi yagona talablar asosida birxillashtirilgan va 500 dan ortiq yangi normativ hujjat ishlab chiqilgan.
Sohani raqamlashtirish doirasida «Shaffof qurilish» milliy axborot tizimi 24 ta axborot platformasi orqali 22 ta davlat organi bilan integratsiya qilingan. Qayd etilishicha, litsenziya berish muddati 10 kundan 10 daqiqagacha qisqartirilgan.
Xalqaro hamkorlikni yana-da rivojlantirish maqsadida Sherzod Hidoyatov oltita taklifni ilgari surdi.
Birinchi taklif sanoat usulida uy-joy qurish va zamonaviy qurilish materiallari ishlab chiqarish sohasida texnologik hamkorlikni kengaytirishdan iborat.
Ikkinchi taklif qurilish normalari va standartlarini o‘zaro yaqinlashtirish, ilmiy-tadqiqot institutlari o‘rtasidagi aloqalarni mustahkamlashni nazarda tutadi.
Uchinchi yo‘nalish bino axborot modellashtirish (BIM) texnologiyalari, sunʼiy intellekt va raqamli boshqaruv tizimlarini rivojlantirishni o‘z ichiga oladi.
To‘rtinchi taklif doirasida mutaxassislar tayyorlash, qo‘shma taʼlim dasturlarini yo‘lga qo‘yish va akademik almashinuvni rivojlantirish ko‘zda tutilgan.
Beshinchi tashabbus zamonaviy shaharsozlik, muhandislik infratuzilmasi va «Aqlli shahar» (Smart City) konsepsiyasi bo‘yicha qo‘shma loyihalarni amalga oshirishga qaratilgan.
Oltinchi taklif esa Markaziy Osiyo – Xitoy seysmik muhandislik assotsiatsiyasini tashkil etishdan iborat.
Ushbu tashabbus doirasida vazir zilzilabardosh qurilish sohasida qo‘shma ilmiy tadqiqotlar o‘tkazish, muhandislik tajribasi bilan almashish, seysmik loyihalash normalarini o‘zaro yaqinlashtirish va malakali mutaxassislar tayyorlashni taklif qildi.
Hidoyatov O‘zbekiston ushbu yo‘nalishlarda hamkorlar bilan faol hamkorlik qilish, tajriba almashish va o‘zaro manfaatli loyihalarni amalga oshirishga tayyor ekanini bildirdi.
