O‘zbekiston va Xitoy davlat xaridlari bo‘yicha hamkorlikni kengaytiradi

Toshkent, O’zbekiston (UzDaily.uz) — O‘zbekiston Sanoat kooperatsiyasi va davlat xaridlari agentligi Xitoy Xalq Respublikasining O‘zbekistondagi Favqulodda va Muxtor Elchisi bilan uchrashuv o‘tkazdi. Unda tomonlar sanoat kooperatsiyasi va davlat xaridlari sohasidagi hamkorlikni kengaytirish istiqbollarini muhokama qildi.

Agentlik vakillari Xitoy tomonini o‘z faoliyatining asosiy yo‘nalishlari, vakolatlari hamda sanoat kooperatsiyasi va davlat xaridlari tizimini takomillashtirishga qaratilgan amalga oshirilayotgan islohotlar bilan tanishtirdi. Davlat xaridlari tizimini 2030 yilgacha rivojlantirish bo‘yicha ustuvor vazifalarga alohida eʼtibor qaratildi.

Muzokaralar davomida xalqaro ekspertlar va maslahatchilarni jalb etish, tajriba almashish dasturlarini amalga oshirish, qo‘shma seminar va treninglar tashkil etish, shuningdek, ilg‘or xalqaro amaliyotlar asosida davlat xaridlari va sanoat kooperatsiyasi tizimlarini kompleks tahlil qilish imkoniyatlari ko‘rib chiqildi.

Bundan tashqari, istiqbolli loyihalarga moliyaviy va ekspert ko‘magini ko‘rsatish, shuningdek, o‘zaro manfaatli yo‘nalishlarda amaliy hamkorlikni kengaytirish masalalari muhokama qilindi.

Uchrashuv yakunlari bo‘yicha tomonlar hamkorlikning ustuvor yo‘nalishlarini belgilash, qo‘shma loyihalar portfelini shakllantirish, ularni amalga oshirish mexanizmlarini ishlab chiqish va keyingi ishchi uchrashuvlarni tashkil etish bo‘yicha o‘zaro anglashuvga erishdi.