O‘zbekiston va Ozarbayjon tovar ayirboshlashi 26 barobar o‘sdi
Toshkent, O’zbekiston (UzDaily.uz) — Toshkentda O‘zbekiston va Ozarbayjon hududlari IV forumi bo‘lib o‘tdi. Unda ikki mamlakatning qariyb 420 ta kompaniyasi, hududlar rahbarlari va ishbilarmon doiralari vakillari ishtirok etdi.
Tadbir O‘zbekiston investitsiyalar, sanoat va savdo vaziri Laziz Qudratov hamda Ozarbayjon iqtisodiyot vaziri Mikail Jabborov ishtirokida o‘tkazildi. Bu haqda O‘zbekiston Investitsiyalar, sanoat va savdo vazirligi xabar berdi.
Forumda qayd etilishicha, so‘nggi o‘n yilda O‘zbekiston va Ozarbayjon o‘rtasidagi tovar ayirboshlash hajmi 26 barobarga oshgan. 2025 yil yakunlariga ko‘ra, bu ko‘rsatkich 795 mln dollarga yetgan. Ikki mamlakat o‘rtasidagi investitsiyaviy va savdo loyihalarining umumiy portfeli esa 10 mlrd dollardan oshgan.
Ishtirokchilar asosiy eʼtiborni hududlararo va ishbilarmonlik hamkorligini kengaytirishga qaratdi. Ustuvor yo‘nalishlar sifatida sanoat va xomashyoni chuqur qayta ishlash, agrosanoat majmuasi, to‘qimachilik sanoati, turizm, hududlarni rivojlantirish, savdo va logistika belgilandi.
Shuningdek, qo‘shilgan qiymatning to‘liq zanjirlarini yaratish va yangi ishlab chiqarish quvvatlarini mahalliylashtirish masalalari muhokama qilindi. Tomonlar mahsulotlarni Yevropa bozorlariga olib chiqishda O‘rta yo‘lak salohiyatidan foydalanish imkoniyatlarini ham ko‘rib chiqdi.
Forumning amaliy qismi B2B va G2B formatlaridagi ikki tomonlama uchrashuvlar bilan davom etdi. Hududlar, davlat tuzilmalari va biznes vakillari aniq loyihalar hamda hamkorlikni rivojlantirish bo‘yicha keyingi qadamlarni muhokama qildi.
Forum yakunida 2026–2027 yillarga mo‘ljallangan qo‘shma harakat rejalarini ishlab chiqish taklif etildi. Erishilgan kelishuvlar ikki tomonlama hujjatlarni almashish orqali mustahkamlandi.
