O‘zbekiston va Mordoviya sanoat kooperatsiyasini kengaytiradi
Toshkent, O’zbekiston (UzDaily.uz) — O‘zbekiston investitsiyalar, sanoat va savdo vaziri Laziz Qudratov 20 avgust kuni Mordoviya Respublikasi rahbari Artyom Zdunov bilan uchrashdi. Tomonlar savdo-iqtisodiy aloqalarni, sanoat kooperatsiyasini va hududlar o‘rtasidagi to‘g‘ridan-to‘g‘ri hamkorlikni kengaytirish masalalarini muhokama qildi.
Uchrashuvda farmatsevtika, elektrotexnika, metallurgiya, qishloq xo‘jaligi, yog‘ochni qayta ishlash va axborot texnologiyalari sohalarida qo‘shma loyihalarni amalga oshirishga alohida eʼtibor qaratildi.
Shuningdek, Buxoro, Navoiy va Jizzax viloyatlaridagi sanoat parklari maydonlarida yangi ishlab chiqarish quvvatlarini joylashtirish imkoniyatlari ko‘rib chiqildi. O‘zbekiston va Mordoviya korxonalari o‘rtasida to‘g‘ridan-to‘g‘ri aloqalarni kengaytirish masalasi ham alohida muhokama qilindi.
Uchrashuv yakunlari bo‘yicha aniq kooperatsiya va investitsiya tashabbuslari ustidagi ishlarni faollashtirish bo‘yicha kelishuvga erishildi.
Ularni amalga oshirish bo‘yicha ikki tomonning tegishli tuzilmalari va ishbilarmon doiralari vakillari hamkorlikni davom ettiradi.
