O‘zbekiston va Janubiy Koreya migrantlar huquqlarini himoya qilishni muhokama qildi
Toshkent, O’zbekiston (UzDaily.uz) — Janubiy Koreyaning Ulsan shahrida tegishli tashkilotlar vakillari O‘zbekiston Migratsiya agentligi orqali Koreya Respublikasida ishga joylashayotgan O‘zbekiston fuqarolari uchun uch tomonlama shartnoma qoidalarini muhokama qildi. Uchrashuvlarda shahar maʼmuriyati, kasaba uyushmalari, xorijiy ishchilar huquqlarini himoya qiluvchi tashkilotlar, Ulsan migrantlarni qo‘llab-quvvatlash markazi, nodavlat tashkilotlar hamda Hyundai korxonasi rahbariyati ishtirok etdi. Bu haqda Migratsiya agentligi matbuot kotibi Gulruh Tulayeva maʼlum qildi.
Ishtirokchilar O‘zbekiston fuqarosi, uning kafili va Migratsiya agentligi o‘rtasida tuziladigan shartnoma shartlarini ko‘rib chiqdi. Tomonlar o‘z pozitsiya va takliflarini bildirganidan so‘ng, hujjatning ayrim qoidalarini aniqlashtirish, ularning mazmunini batafsil bayon etish hamda tegishli o‘zgartishlar kiritishni tavsiya qildi.
Tulayevaning so‘zlariga ko‘ra, shartnomani qayta ko‘rib chiqishdan asosiy maqsad Janubiy Koreyada mehnat qilayotgan O‘zbekiston fuqarolarining huquq va qonuniy manfaatlarini yana-da kuchaytirishdan iborat. Bundan tashqari, kelishuv shartlarini yana-da aniq va shaffof qilish orqali mehnat munosabatlari tomonlari o‘rtasida tushunmovchiliklar yuzaga kelish xavfini kamaytirish ko‘zda tutilmoqda.
Muhokamada Ulsan kasaba uyushmalari, Migrantlar markazi va kemasozlik sohasida mehnat qilayotgan Qoraqalpog‘iston fuqarolari huquqlarini himoya qilish bilan shug‘ullanuvchi tashkilotlar vakillari ishtirok etdi. Shuningdek, Hyundai korxonalarida ishlayotgan xorijiy ishchilar muammolarini o‘rganuvchi tashkilotlar ham o‘z pozitsiyalarini taqdim etdi.
Tulayevaning maʼlum qilishicha, Migratsiya agentligi hozirda uch tomonlama shartnomani qayta ko‘rib chiqmoqda. Uning so‘zlariga ko‘ra, bo‘lib o‘tgan uchrashuv barcha manfaatdor tomonlarning fikrlarini olish va hujjatni takomillashtirishda ularning takliflarini inobatga olish maqsadida tashkil etilgan.
Shartnomani qayta ko‘rib chiqish masalasi Koreya ommaviy axborot vositalarida ham muhokama qilinmoqda.
Migratsiya agentligi vakili shartnoma qoidalari amaliy ahamiyatga ega ekanini taʼkidladi. Nizolar yuzaga kelgan taqdirda, ular daʼvo talablarini asoslash uchun qo‘llanilishi mumkin. Shu bois hujjat shartlarini aniqlashtirish Janubiy Koreyada mehnat qilayotgan O‘zbekiston fuqarolarining huquqlarini yana-da ishonchli himoya qilish mexanizmlaridan biri sifatida ko‘rilmoqda.
