O‘zbekiston va Iordaniya qo‘shma komissiya tuzdi

Toshkent, O‘zbekiston (UzDaily.uz) — O‘zbekiston Respublikasi Prezidentining «Xalqaro shartnomani tasdiqlash to‘g‘risida»gi qarori qabul qilindi. Unga muvofiq, O‘zbekiston Hukumati va Iordaniya Hashimiylar Podshohligi o‘rtasida ikki tomonlama hamkorlik bo‘yicha qo‘shma komissiya tuzish haqidagi kelishuv tasdiqlandi.

Hujjat ikki davlat o‘rtasida turli sohalarda hamkorlikni rivojlantirish va muvofiqlashtirishga qaratilgan yangi hamkorlik mexanizmini shakllantirishni nazarda tutadi. Kelishuv 2025 yil 26 avgust kuni Samarqand shahrida imzolangan.

Qarorga muvofiq, O‘zbekiston Respublikasi Investitsiyalar, sanoat va savdo vazirligi xalqaro shartnoma qoidalarini amalga oshirish uchun masʼul vakolatli organ etib belgilandi.

Vazirlar Mahkamasi hamda tegishli vazirlik va idoralar shartnoma kuchga kirgandan so‘ng uning bajarilishini nazorat qiladi va belgilangan tartibda amaliy ijrosini muvofiqlashtirib boradi.