O‘zbekiston va BMT ijtimoiy volontyorlikni muhokama qildi

Toshkent, O’zbekiston (UzDaily.uz) — O‘zbekiston Milliy ijtimoiy himoya agentligi BMT Volontyorlar dasturining (UNV) ijrochi koordinatori Toyli Qurbonov bilan mamlakatda ijtimoiy volontyorlikni rivojlantirish masalalarini muhokama qildi.

Tomonlar ijtimoiy sohada ko‘ngillilar yordamining barqaror milliy tizimini shakllantirish imkoniyatlarini ko‘rib chiqdi.

Hozirgi vaqtda «Volontyorlar — Inson» va “Mehr” loyihalari doirasida ko‘ngillilar ijtimoiy xodimlar bilan birgalikda yordamga muhtoj fuqarolar, keksalar va og‘ir hayotiy vaziyatga tushib qolgan oilalarni qo‘llab-quvvatlamoqda.

Uchrashuv davomida “Inson” markazlari negizida ijtimoiy volontyorlikni yana-da rivojlantirish bo‘yicha chora-tadbirlar taklif qilindi. Shuningdek, ko‘ngillilarni BMT Volontyorlar dasturi imkoniyatlariga kengroq jalb qilish va inklyuziv volontyorlikni rivojlantirish masalalari muhokama qilindi.

Tomonlar ushbu yo‘nalishlarda hamkorlikni mustahkamlash va qo‘shma loyihalarni amalga oshirish bo‘yicha keyingi qadamlarni belgilab oldi.