Toshkent, O’zbekiston (UzDaily.uz) — O‘zbekistonlik hakamlar brigadasi 2026 yilgi futbol bo‘yicha jahon chempionatida navbatdagi tayinlovni oldi. Bu haqda O‘zbekiston futbol assotsiatsiyasi xabar qildi.
Paragvay va Fransiya terma jamoalari o‘rtasidagi 1/8 final uchrashuviga Ilgiz Tantashev boshchiligidagi hakamlar brigadasi xizmat qiladi. Bosh hakam yordamchilari etib Andrey Sapenko va Timur G‘aynullin tayinlangan.
Uchrashuv 4 iyul kuni Filadelfiya shahrida bo‘lib o‘tadi. Toshkent vaqti bilan boshlanish hushtagi 5 iyul kuni soat 02:00 da yangraydi.
O‘zbekiston futbol assotsiatsiyasi maʼlumotiga ko‘ra, mazkur o‘yin AQSH mustaqilligining 250 yilligi munosabati bilan tashkil etilayotgan tadbirlar doirasida o‘tkaziladi. Uchrashuvda yuqori lavozimli davlat amaldorlari ishtirok etishi kutilmoqda.
