Oʻzbekiston hokimliklari majburiy mehnatga qarshi ogohlantirmoqda
Toshkent, O’zbekiston (UzDaily.uz) — O‘zbekiston hokimliklari majburiy mehnatga yo‘l qo‘ymaslik haqida ogohlantirildi / Foto: Sunʼiy intellekt yordamida yaratilgan tasvir.
Mehnat davlat inspeksiyasi Qoraqalpog‘iston Respublikasi Vazirlar Kengashi, viloyatlar, Toshkent shahri, shuningdek, tuman va shahar hokimliklariga majburiy mehnatga yo‘l qo‘yilmasligi haqida rasmiy ogohlantirish xatlarini yubordi.
Vazirlikda taʼkidlanishicha, xodimlarning roziligisiz, tahdid yoki bosim ostida ularni belgilangan ish vaqti davomiyligidan tashqari, shuningdek, dam olish va bayram kunlarida ishlashga jalb qilish mumkin emas.
Ogohlantirish mehnat qonunchiligi buzilishining oldini olish va xodimlarning huquqlarini himoya qilishga qaratilgan.
Mehnat davlat inspeksiyasi maʼlumotlariga ko‘ra, joriy yilning sakkiz oyi davomida majburiy mehnat holatlariga yo‘l qo‘yilgani bilan bog‘liq holda hokimliklarning uch nafar mansabdor shaxsi maʼmuriy javobgarlikka tortilgan.
Inspeksiyada maʼlum qilinishicha, majburiy mehnat bilan bog‘liq aniqlangan barcha qoidabuzarliklar qonunchilikda belgilangan tartibda ko‘rib chiqiladi. Aybdor deb topilgan shaxslarga nisbatan qatʼiy choralar ko‘riladi.
Majburiy mehnatga duch kelgan yoki bunday holatlar haqida maʼlumotga ega bo‘lgan fuqarolarga Mehnat davlat inspeksiyasiga murojaat qilish tavsiya etildi.
Bunday holatlar haqida @munosibmehnat_bot Telegram-boti orqali, +998 71 200-06-00 ishonch telefoni yoki 1176 qisqa raqami orqali xabar berish mumkin.
