Oʻzbekiston elektr energiyasi taqsimlash tarmoqlarini Turkiya kompaniyasining xususiy boshqaruviga oʻtkazdi

Toshkent, O’zbekiston (UzDaily.uz) — O‘zbekiston birinchi marta taqsimlovchi elektr tarmoqlarini majburiy kapital qo‘yilmalari sharti bilan xususiy investor boshqaruviga berdi. Bu haqda Prezident Shavkat Mirziyoyev huzurida yoqilg‘i-energetika kompleksi masalalari bo‘yicha o‘tkazilgan yig‘ilishda Energetika vaziri Sherzod Xo‘jayev maʼlum qildi.

Xalqaro tender yakunlariga ko‘ra, hududlardagi elektr tarmoqlari ularni modernizatsiya qilish bilan shug‘ullanadigan Turkiyaning «Aksa Elektrik» kompaniyasi boshqaruviga berildi.

Vazir «O‘zbekiston 24» telekanaliga bergan intervyusida taʼkidlaganidek, barcha mahalliy xodimlar o‘z ish joylarida saqlab qolinadi, xorijdan esa faqat 15 nafar mutaxassis jalb qilinadi.

Investor bir qator majburiyatlarni o‘z zimmasiga olgan. Jumladan, uskunalarning kamida 90 foizini mahalliy ishlab chiqaruvchilardan xarid qilish va ikki yil muddatda mahallalarda 400 ta mikroloyihani ishonchli bank kafolatlari asosida amalga oshirish belgilangan.

Loyiha Energetika vazirligining yig‘ilishdagi kengroq taqdimotining bir qismi bo‘ldi. Unda, shuningdek, 14 ta pilot tumanda mahallalarning energetik pasportlarini shakllantirish bo‘yicha amalga oshirilgan ishlar natijalari hamda Afg‘onistonda o‘zbek kompaniyalari tomonidan elektr tarmoqlarini qurish masalalari muhokama qilindi.