Ikki ayol O‘zbekistondan 240 ming dollar olib chiqmoqchi bo‘ldi

Toshkent, O’zbekiston (UzDaily.uz) — Qo‘shni davlatning ikki nafar fuqarosi O‘zbekistondan 240 ming dollar naqd pulni olib chiqib ketishga uringan. Ular pullarni kiyimlari ostiga yashirib, boldirlariga skotch bilan mahkamlab qo‘ygan.

Ayollar Toshkent viloyatidagi “Navoiy” chegara bojxona postida ushlangan. Bu haqda Bojxona qo‘mitasi matbuot xizmati xabar berdi.

Bojxona ko‘rigi vaqtida ushlangan ayollarning biridan 80 ming dollar, ikkinchisidan esa 160 ming dollar aniqlangan. Pul kupyuralari boldir qismiga skotch bilan bog‘langan va kiyim ostiga yashirilgan.

Bojxonachilar yo‘lovchilarni tekshirish jarayonida yashirilgan naqd pullarni aniqlagan. Qo‘mita tomonidan eʼlon qilingan videokadrlarda ayollarning oyoqlaridan briket shaklida qadoqlangan pul kupyuralari o‘ralgan bog‘lamlar yechib olinayotgani aks etgan.

Aniqlangan naqd xorijiy valyutaning umumiy miqdori 240 ming dollarni tashkil etgan.