Ijtimoiy himoya milliy agentligi yetimlar uy-joyini xususiylashtirish tartibini tushuntirdi

Toshkent, O‘zbekiston (UzDaily.uz) — O‘zbekiston Respublikasi Prezidenti huzuridagi Ijtimoiy himoya milliy agentligi ijtimoiy tarmoqlarda yetim bolalar va ota-ona qaramog‘isiz qolgan shaxslarga berilgan uy-joylarni xususiylashtirish masalasi bo‘yicha tarqalayotgan xabarlar ortidan rasmiy tushuntirish berdi.

Idora maʼlum qilishicha, davlat uy-joy fondi hisobidan ijara asosida berilgan turar joylarni xususiylashtirish imkoniyati mavjud emasligi haqidagi masalalar ko‘tarilgan publikatsiyalar o‘rganib chiqilgan.

Taʼkidlanishicha, 2021 yil 25 oktyabrga qadar yetim bolalar uchun uy-joylar O‘zbekiston Respublikasi Vazirlar Mahkamasining 2010 yil 2 avgustdagi 164-sonli qaroriga muvofiq davlat uy-joy fondi hisobidan ijara asosida foydalanish huquqi bilan berilgan.

O‘zbekiston Respublikasi Uy-joy kodeksining 8-moddasiga ko‘ra, maqsadli kommunal uy-joy fondidagi turar joylar ijtimoiy himoyaga muhtoj va kam taʼminlangan fuqarolarga xususiylashtirish huquqisiz ijara asosida beriladi. Bunday fondni boshqarish mahalliy davlat hokimiyati organlari — hokimliklar vakolatiga kiradi.

Agentlikda taʼkidlanishicha, ushbu fondga kiruvchi turar joylar idora tasarrufida emas va agentlik davlat uy-joy fondini xususiylashtirish masalalarini ko‘rib chiqish vakolatiga ega emas.

Shuningdek, xususiylashtirish tartibi Vazirlar Mahkamasining 2024 yil 11 martdagi 124-sonli «Davlat uy-joy fondidan foydalanish va uni tasarruf etish tartibi to‘g‘risidagi nizomni tasdiqlash haqida»gi qarori bilan tartibga solinishi, ushbu sohada vakolatli organlar esa tuman va shahar hokimliklari ekani tushuntirildi.

2010 yil 2 avgustdagi 164-sonli qaror asosida uy-joy olgan fuqarolarga xususiylashtirish masalalari bo‘yicha tegishli mahalliy hokimliklarga yoki my.gov.uz davlat xizmatlari portali orqali murojaat qilish tavsiya etildi.