Belgiya va AQSH JCHning 1/8 finaliga yo‘l oldi

Toshkent, O’zbekiston (UzDaily.uz) — AQSH, Kanada va Meksikada o‘tayotgan futbol bo‘yicha jahon chempionatida Belgiya va AQSH terma jamoalari 1/16 final bosqichidan muvaffaqiyatli o‘tdi. Endi ular chorak finalga chiqish uchun o‘zaro bahs olib boradi.

Eng dramatik uchrashuvlardan biri Sietl shahrida Belgiya va Senegal o‘rtasida bo‘lib o‘tdi. Asosiy vaqt 2:2 hisobida yakunlandi. Senegalliklar 24-daqiqada Habib Diarra va 51-daqiqada Ismaila Sarrning gollari evaziga ikki marta oldinga chiqishdi. Belgiyaliklar esa o‘yin oxirida vaziyatni qutqarib qolishdi: Romelu Lukaku 86-daqiqada gol urgan bo‘lsa, Yuri Tilemans 89-daqiqada hisobni tenglashtirdi.

Belgiya terma jamoasiga g‘alabani ikkinchi qo‘shimcha bo‘limning kompensasiya qilingan beshinchi daqiqasida Tilemans tomonidan aniq amalga oshirilgan penalti keltirdi. O‘n bir metrlik jarima zarbasi uchrashuvning 117-daqiqasida sodir etilgan qoidabuzarlikdan so‘ng belgilandi.

Ismaila Sarr uchun mazkur gol joriy jahon chempionatidagi to‘rtinchi gol bo‘ldi. U 1990 yilgi jahon chempionatida kamerunlik Roje Milla o‘rnatgan Afrika terma jamoalari futbolchilari orasidagi rekordni takrorladi.

1/16 finalning yana bir bahsida AQSH terma jamoasi San-Fransiskoda o‘z maydonida Bosniya va Gersegovina jamoasini 2:0 hisobida mag‘lub etdi. Gollarga 45-daqiqada Folarin Balogan va 82-daqiqada Malik Tillman mualliflik qildi. Shu bilan birga, Balogan 64-daqiqada qo‘pol o‘yin uchun qizil kartochka olib, maydonni tark etdi.

Bosniya va Gersegovina terma jamoasi safida 40 yoshli hujumchi Edin Jeko ilk daqiqalardan maydonga tushdi va jahon chempionati pley-off bosqichida ishtirok etgan tarixdagi eng yoshi katta maydon futbolchisiga aylandi.

AQSH va Belgiya terma jamoalari o‘rtasidagi 1/8 final bahsi 6 iyul kuni Sietl shahrida bo‘lib o‘tadi.

Bu yilgi Jahon chempionati birinchi marta uchta mamlakat - Qo‘shma Shtatlar, Kanada va Meksikadan 48 ta milliy terma jamoa ishtirokida o‘tkazilmoqda. Turnir 19 iyul kuni yakunlanadi.