AQSH JCH-2026da Paragvayni yirik hisobda mag‘lub etdi

Toshkent, O’zbekiston (UzDaily.uz) — Shimoliy Amerikada o‘tayotgan 2026 yilgi futbol bo‘yicha jahon chempionati doirasida D guruhining birinchi tur uchrashuvi bo‘lib o‘tdi. AQSH terma jamoasi Kaliforniya shtatidagi Los-Anjeles shahri stadionida Paragvay milliy jamoasi ustidan 4:1 hisobida ishonchli g‘alabaga erishdi. Ushbu bahs boshlangan jahon chempionatining bir qator statistik rekordlari bilan ham yodda qoldi.

Uchrashuvda hisob 7-daqiqadayoq kutilmagan holat orqali ochildi: Paragvay yarim himoyachisi Damyan Bobadilya to‘pni o‘z darvozasiga yo‘llab qo‘ydi va joriy mundialdagi ilk avtogol muallifiga aylandi. Shundan keyin tashabbus mezbonlar tomoniga o‘tdi. AQSH hujumchisi Folarin Balogan 31-daqiqada va birinchi bo‘limga qo‘shib berilgan vaqtda (45+5) aniq zarba bilan gol urdi hamda turnirdagi ilk dublni rasmiylashtirdi.

O‘yinning ikkinchi bo‘limida, 73-daqiqada Maurisio Lotin Amerikasi jamoasi safida bitta gol urib hisobni qisqartirdi. Biroq uchrashuvning so‘nggi qismida (90+8) Djovanni Reyna yakuniy yirik hisobni o‘rnatdi.

Eslatib o‘tamiz, D guruhida AQSH va Paragvaydan tashqari Turkiya hamda Avstraliya terma jamoalari ham ishtirok etmoqda. Ularning o‘zaro bahsi 14 iyun kuniga rejalashtirilgan.

Guruh bosqichining ikkinchi turida AQSH jamoasi 19 iyun kuni Avstraliyaga qarshi maydonga tushadi. Paragvay esa keyingi kuni Turkiya terma jamoasi bilan bahs olib boradi.