Тошкент, Ўзбекистон (UzDaily.uz) — UzAuto Motors компаниясининг 2026 йил январь–сентябрь ойларидаги соф фойдаси 1,867 трлн сўмни ташкил этиб, ўтган йилнинг мос даврига нисбатан 46,9 фоизга камайди. Бу ҳақда компаниянинг 31 октябрь куни корпоратив ахборот порталида эълон қилинган молиявий ҳисоботида маълум қилинган.
2025 йилнинг дастлабки тўққиз ойида автомобил ишлаб чиқарувчи компания 3,517 трлн сўм соф фойда олган эди. Шу тариқа, кўрсаткич 1,65 трлн сўмга камайган.
Компаниянинг автомобиллар, эҳтиёт қисмлар ва бошқа маҳсулотларни сотишдан тушган тушуми 13,2 фоизга — 34,71 трлн сўмдан 30,12 трлн сўмгача пасайди. Сотилган маҳсулотлар таннархи эса 11,2 фоизга, яъни 30,61 трлн сўмдан 27,17 трлн сўмгача қисқарди.
Ишлаб чиқариш харажатлари тушумга нисбатан секинроқ камайгани сабабли UzAuto Motors’нинг ялпи фойдаси 28,2 фоизга — 4,1 трлн сўмдан 2,94 трлн сўмгача тушди. Ялпи фойданинг тушумдаги улуши бир йил аввалги 11,8 фоизга нисбатан 9,8 фоизни ташкил этди.
Операцион фойда янада сезиларли даражада — 56,2 фоизга, 2,96 трлн сўмдан 1,3 трлн сўмгача камайди. Шу билан бирга, маҳсулотларни сотиш харажатлари 14,3 фоизга ошиб, 2025 йилнинг дастлабки тўққиз ойидаги 1,02 трлн сўмга нисбатан 1,17 трлн сўмга етди.
Солиқ тўлангунга қадар фойда 47,4 фоизга — 4,09 трлн сўмдан 2,15 трлн сўмгача камайди.
Ижобий валюта курслари фарқидан олинган фойда 726,3 млрд сўмдан 173,9 млрд сўмгача ёки 76 фоизга қисқарди. Айни вақтда молиявий даромадлар 879,3 млрд сўмдан 1,2 трлн сўмгача ошди.
Кредитлар ва молиявий ижарага хизмат кўрсатиш харажатлари 481,2 млрд сўмдан 525,1 млрд сўмгача кўпайди.
2026 йил 30 сентябрь ҳолатига кўра, UzAuto Motors захиралари 17,57 трлн сўмга баҳоланган. Йил бошида бу кўрсаткич 11,7 трлн сўмни ташкил этган эди. Тўққиз ой давомида захиралар қиймати 5,87 трлн сўмга ёки 50,2 фоизга ошди.
Қисқа муддатли савдо ва бошқа кредиторлик қарзлари 3,07 трлн сўмдан 5,99 трлн сўмгача кўпайди. Бу йил бошидаги кўрсаткичдан 95,5 фоизга юқори.
Шу билан бир вақтда, пул маблағлари ва уларнинг эквивалентлари 1,33 трлн сўмдан 257,2 млрд сўмгача ёки 80,6 фоизга камайди.
Ҳисобот даврида компания активлари 31,75 трлн сўмдан 35,31 трлн сўмга, мажбуриятлари эса 16,2 трлн сўмдан 17,99 трлн сўмгача ошди. Ўз капитали 15,55 трлн сўмдан 17,32 трлн сўмга кўпайди.
