Тошкент, Ўзбекистон (UzDaily.uz) — Туркий инвестиция фонди (ТИФ) Бошқарув кенгаши элчи Қубаничбек Омуралиевни фонд президенти этиб бир овоздан сайлади. У 2026 йил 12 ноябрдан ўз вазифаларини бажаришга киришди. Бу ҳақда ТИФ матбуот хизмати хабар берди.
Бошқарув кенгаши фонднинг олий бошқарув органи ҳисобланади. Унда олтита аъзо давлат — Озарбайжон, Венгрия, Қозоғистон, Қирғиз Республикаси, Туркия ва Ўзбекистон вакиллари иштирок этади.
Омуралиев фонднинг биринчи президенти Боғдод Амреев ўрнини эгаллади. Унинг ваколат муддати 2026 йил 11 ноябрда якунланган.
Фонднинг янги раҳбари дипломатия ва минтақавий ҳамкорлик соҳасида катта тажрибага эга. 2022 йил ноябрь ойида Самарқандда бўлиб ўтган Туркий давлатлар ташкилотининг (ТДТ) IX саммитида у ташкилот бош котиби этиб тайинланган.
Бунга қадар Омуралиев Қирғиз Республикасининг Туркия Республикасидаги элчиси ва Қирғиз Республикасининг Мустақил Давлатлар Ҳамдўстлиги ҳузуридаги доимий вакили лавозимларида фаолият юритган.
Унинг раҳбарлигида фонд минтақа мамлакатлари ўртасидаги алоқаларни мустаҳкамлайдиган, трансчегаравий савдо ва инвестиция имкониятларини кенгайтирадиган ҳамда барқарор ривожланишни қўллаб-қувватлайдиган лойиҳаларни молиялаштиришни давом эттиради.
Шу тариқа, ТИФ аъзо давлатлар ўртасидаги иқтисодий ҳамкорликни ривожлантиришни мақсад қилган.
