Тошкент, Ўзбекистон (UzDaily.uz) — Ўзбекистонда товарлар ва хизматларни реализация қилишда тўланган қўшилган қиймат солиғини (ҚҚС) импорт қилинадиган маҳсулотлар бўйича ҳисобланадиган ҚҚС ҳисобига ўзаро ҳисобга олишнинг янги тартиби тасдиқланди. Тегишли норматив-ҳуқуқий ҳужжат 2026 йил 31 октябрда Адлия вазирлиги томонидан 3966-сон билан рўйхатдан ўтказилди.
Ҳужжатга мувофиқ, солиқ тўловчилар товарлар ва хизматларни реализация қилишда ортиқча тўланган ҚҚС суммаларини импорт қилинадиган товарлар бўйича солиқ мажбуриятларини қоплашга йўналтиришлари мумкин.
Ўзаро ҳисобга олиш жараёни солиқ ва божхона органлари иштирокида бир неча босқичда амалга оширилади.
Биринчи босқичда солиқ тўловчи божхона юк декларацияси орқали тегишли солиқ ва божхона органларига мурожаат қилиб, ҚҚСни ўзаро ҳисобга олиш ниятини билдиради.
Шундан сўнг Божхона қўмитаси импорт операцияларида фойдаланиш мумкин бўлган ортиқча тўланган ҚҚС суммалари мавжудлигини текшириш учун Солиқ қўмитасига сўров юборади.
Солиқ қўмитаси ҳисобга олиш учун мавжуд маблағлар миқдори тўғрисидаги маълумотни божхона органига тақдим этади. Олинган маълумотлар асосида ўзаро ҳисобга олиш далолатномаси автоматик тарзда шакллантирилади.
Якуний босқичда Божхона қўмитаси далолатномада кўрсатилган суммани солиқ тўловчининг божхона органларидаги шахсий ҳисобварағида акс эттиради ва божхона юк декларациясини расмийлаштиради.
Жараённинг барча босқичларида икки идора ўртасидаги ҳамкорлик автоматлаштирилган тарзда амалга оширилади. Янги механизм тадбиркорлар учун импорт операцияларини соддалаштириш ва ҚҚСни тўлашдаги маъмурий жараёнларни қисқартиришга қаратилган.
