Тошкент, Ўзбекистон (UzDaily.uz) — Ўзбекистонда куз-қиш мавсумида жамоат транспортига газ ёқилғиси қуйишда устуворлик бериш таклиф этилмоқда.
Ушбу чора 2030 йилгача маҳаллий йўловчи ташиш соҳасини ривожлантириш стратегияси тўғрисидаги президент қарори лойиҳасида назарда тутилган.
Лойиҳага кўра, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларига Энергетика вазирлиги ҳамда Транспорт вазирлиги билан биргаликда жамоат транспортини газ ёқилғиси билан узлуксиз таъминлашни ташкил этиш топширилади.
Бунинг учун газ қуйиш шохобчаларида автобуслар ва бошқа жамоат транспорти воситалари учун алоҳида навбат — «яшил йўлак» ажратиш таклиф қилинмоқда. Бу йўловчи ташувчиларга куз-қиш мавсумида устувор тартибда хизмат кўрсатилишини таъминлашга қаратилган.
Шу билан бирга, лойиҳада ушбу чора қачондан амалга киритилиши, қайси газ қуйиш шохобчаларида янги тартиб жорий этилиши ва алоҳида навбатни ташкил қилишнинг аниқ механизми кўрсатилмаган.
