Тошкент, Ўзбекистон (UzDaily.uz) — Ўзбекистон Олий Мажлиси Қонунчилик палатаси миграция ва персоналлаштириш бўлинмалари фаолиятини такомиллаштиришга қаратилган айрим қонун ҳужжатларига ўзгартириш ва қўшимчалар киритиш тўғрисидаги қонун лойиҳасини биринчи ўқишда қабул қилди.
Ҳужжатда хорижий фуқаролар ва фуқаролиги бўлмаган шахсларни турган жойи бўйича рўйхатга олиш муддатларини аниқлаштириш назарда тутилган. Жумладан, амалдаги қонунчиликда ойлар билан белгиланган муддатларни календарь кунларда ҳисобланадиган муддатларга алмаштириш таклиф этилмоқда.
Қонун лойиҳасида таъкидланишича, бундай ёндашув рўйхатга олиш муддатларини аниқ белгилаш ва тегишли нормаларни амалиётда турлича талқин қилишнинг олдини олиш имконини беради.
Бундан ташқари, миграция ва персоналлаштириш соҳасидаги давлат органларининг ваколатлари ҳамда номларини амалдаги ташкилий тузилмага мувофиқлаштириш мақсадида бир қатор қонун ҳужжатларига ўзгартириш киритиш таклиф этилмоқда.
Хусусан, «миграция ва фуқароликни расмийлаштириш» атамасини «миграция ва персоналлаштириш» иборасига алмаштириш назарда тутилган. Бу қонунчиликда атамаларнинг бир хил қўлланилишини таъминлаши керак.
Депутатларнинг фикрича, қонун лойиҳасининг қабул қилиниши хорижий фуқаролар ва фуқаролиги бўлмаган шахсларнинг ноқонуний меҳнат фаолиятининг олдини олиш, миграция соҳасидаги давлат хизматлари самарадорлигини ошириш ҳамда қонунчилик нормаларини ўзаро мувофиқлаштиришга хизмат қилади.
