Тошкент, Ўзбекистон (UzDaily.uz) — Тошкентдаги Боткин қабристонида қурилиш ишлари олиб борилаётганда қабристон ҳудудини собиқ шампан вино заводидан ажратиб турган девор қулаб тушди.
Оқибатда бир нечта қабртош шикастланди. Қабрлар очилмаган. Бу ҳақда пойтахт ҳокимлиги маълум қилди.
Ҳодиса ҳақидаги маълумотлар ижтимоий тармоқларда пайдо бўлди. Фойдаланувчиларнинг хабарларига кўра, воқеа 18 октябрь куни содир бўлган бўлиши мумкин, айрим видеолар эса 21 октябрь куни тасвирга олинган.
Ҳокимлик маълумотига кўра, қабристоннинг 15-секторидаги охирги қаторда жойлашган қабртошлар шикастланган.
Тошкент шаҳар ҳокимлиги ва шаҳар Ободонлаштириш бошқармаси вазиятни назоратга олди. Қоидабузарликлар билан олиб борилган қурилиш ишлари тўхтатилди, масъул шахслар аниқланди.
Ҳокимликда маълум қилинишича, ҳодисанинг ҳолатлари ва масъул шахсларнинг ҳаракатларига ҳуқуқий баҳо берилади.
Айбдорлар белгиланган тартибда жавобгарликка тортилади.
«Биз марҳумларнинг яқинлари қайғуси ва ғазабини тушунамиз. Вафот этганлар хотирасига ва уларнинг яқинлари ҳис-туйғуларига ҳурмат сўзсиз таъминланиши керак», — дея таъкидлади ҳокимлик.
Буюртмачи ва пудратчи ташкилотга шикастланган қабртошларни ҳафта охирига қадар тиклаш мажбурияти юклатилди.
