Тошкент, Ўзбекистон (UzDaily.uz) — Ўзбекистон таълим ва фан вазири Эркинжон Турдимов Самарқандда халқаро ҳамкорлар билан қатор учрашувлар ўтказди. Уларда таълим соҳасидаги ҳамкорликни ривожлантириш ва ўқитиш сифатини ошириш масалалари муҳокама қилинди.
Музокаралар «Болалар фаровонлигига инвестициялар: келажак авлодлар учун барқарор ва адолатли ривожланиш сари» мавзусидаги Жаҳон саммити доирасида бўлиб ўтди.
Қирғизистон таълим ва фан вазири Догдуркул Кендирбаева билан учрашувда қирғиз тилида таълим бериладиган мактаблар учун дарсликлар тайёрлаш, ўқитувчилар малакасини ошириш ва тажриба алмашиш масалалари кўриб чиқилди. Шунингдек, икки мамлакат олий таълим муассасалари ўртасида қўшма таълим дастурларини йўлга қўйиш ва талабалар алмашинувини ташкил этишга алоҳида эътибор қаратилди.
Франциянинг болалар масалалари бўйича олий комиссари Сара Эль-Хайри билан музокараларда мактабгача таълимни ривожлантириш, инклюзив таълимни қўллаб-қувватлаш ва педагогларнинг касбий маҳоратини ошириш масалалари муҳокама қилинди. Томонлар, шунингдек, тажриба алмашиш ҳамда болалар фаровонлигини таъминлашга қаратилган қўшма ташаббусларни амалга ошириш имкониятларини кўриб чиқди.
Жаҳон банкининг Европа ва Марказий Осиё бўйича инсон капиталини ривожлантириш йўналиши минтақавий директори Апарна Соманатан билан учрашувда мактаб таълими сифатини ошириш, таълим инфратузилмасини модернизация қилиш ва ўқитувчиларнинг касбий салоҳиятини мустаҳкамлаш асосий мавзу бўлди. Шу билан бирга, томонлар «Билим» лойиҳасини амалга ошириш истиқболларини муҳокама қилди.
Учрашувлар халқаро ҳамкорликни кенгайтириш, илғор таълим тажрибаларини жорий этиш ва болаларнинг сифатли таълим олиши учун қўшимча имкониятлар яратишга қаратилди.
