Тошкент, Ўзбекистон (UzDaily.uz) — Ўзбекистон ва БМТнинг Озиқ-овқат ва қишлоқ хўжалиги ташкилоти (FAO) сунъий интеллектдан фойдаланган ҳолда қишлоқ хўжалигини рақамлаштириш бўйича лойиҳа ишлаб чиқиш масаласини муҳокама қилди. Бу ҳақда Ўзбекистон Қишлоқ хўжалиги вазирлиги хабар берди.
Вазирлик вакиллари FAO Инвестициялар маркази делегацияси билан учрашув ўтказди. Учрашув иштирокчилари аграр сектордаги ҳамкорликни кенгайтириш, хорижий инвестицияларни жалб қилиш ва қўшма лойиҳаларни амалга ошириш истиқболларини кўриб чиқди.
Томонлар қишлоқ хўжалигининг устувор йўналишларидаги инвестиция имкониятларига алоҳида эътибор қаратди.
Шунингдек, амалдаги лойиҳаларни қўллаб-қувватлаш ҳамда халқаро ҳамкорлар иштирокида янги ташаббусларни тайёрлаш масалалари муҳокама қилинди.
Музокараларнинг яна бир мавзуси аграр соҳани рақамлаштириш бўлди. Иштирокчилар бошқарув жараёнларига замонавий ахборот технологияларини жорий этиш ва сунъий интеллект имкониятларидан фойдаланиш масалаларини кўриб чиқди.
Учрашув давомида FAO ушбу йўналишларда махсус лойиҳани ишлаб чиқиш ва амалга ошириш ташаббуси билан чиқди.
Ҳозирча лойиҳанинг аниқ параметрлари, амалга ошириш муддатлари ва молиялаштириш ҳажми ошкор этилмаган.
Томонлар илгари сурилган ташаббуслар ўзаро манфаатли ҳамкорликни кенгайтириш, инвестиция лойиҳаларининг амалий самарадорлигини ошириш ва Ўзбекистон қишлоқ хўжалигини барқарор ривожлантиришга қаратилганини таъкидлади.
