Тошкент, Ўзбекистон (UzDaily.uz) — Ўзбекистон ва Индонезия ташқи ишлар вазирлари Бахтиёр Саидов ҳамда Арманатха Насир телефон орқали мулоқот ўтказди. Томонлар икки томонлама муносабатларни ривожлантириш ва иқтисодий ҳамкорликни кенгайтириш масалаларини муҳокама қилди.
Суҳбат давомида ташқи сиёсат идоралари раҳбарлари анъанавий дўстона алоқаларни мустаҳкамлаш ва сиёсий мулоқотни фаоллаштириш истиқболларини кўриб чиқди.
Томонлар савдо-иқтисодий ва инвестициявий ҳамкорликка алоҳида эътибор қаратди. Вазирлар иқтисодий ҳамкорликни сифат жиҳатидан янги босқичга олиб чиқиш устувор вазифалардан бири бўлиб қолаётганини таъкидлади.
Саидов ва Насир, шунингдек, БМТ ва бошқа халқаро ташкилотлар доирасидаги ҳамкорликни янада ривожлантириш муҳимлигини қайд этди.
Бундан ташқари, томонлар бўлажак тадбирлар кун тартиби юзасидан фикр алмашди.
