Тошкент, Ўзбекистон (UzDaily.uz) — Тошкентнинг Учтепа туманида 90 сотих майдонни эгаллаган бўш ер участкасида сунъий кўл ва дам олиш ҳудудини барпо этиш ишлари бошланди.
Майдон «Қўрғонтепа» маҳалласининг 11-мавзесида, 340- ва 346-сонли давлат мактабгача таълим ташкилотлари ўртасида жойлашган. Ишларни декабрь ойида якунлаш режалаштирилган. Бу ҳақда Учтепа тумани ҳокимлиги хабар берди.
Кўл 37 сотих майдонни эгаллайди, унинг чуқурлиги 2 метрни ташкил этади. Учтепа тумани ҳокимлиги қурилиш бўлими бошлиғи Абдулла Ардиевнинг айтишича, сув ҳавзасига сув икки усулда — кўча бўйлаб ўтувчи ариқдан ва қудуқдан етказиб берилиши режалаштирилган.
Кўлда чўмилиш тақиқланади. Сув ҳавзаси, биринчи навбатда, ҳудуд микроиқлимини яхшилаш ва чанг миқдорини камайтиришга хизмат қилади.
Ҳудудда турли навларга мансуб 66 туп манзарали дарахт ўсади. Уларнинг барчаси сақлаб қолинади, шунингдек, янги дарахтлар экиш ҳам режалаштирилган.
Кўл атрофида пиёдалар йўлаклари қурилади, дам олиш ҳудуди, айвон, ўриндиқлар ва кўкаламзор майдонлар ташкил этилади. Лойиҳани амалга ошириш икки ойга мўлжалланган.
Маҳаллий аҳоли лойиҳани қўллаб-қувватламоқда. «Ҳозир чанг ва шовқин бор, лекин сабр қилсак, кейин хурсанд бўламиз», — деди Умида Тухтамишева.
Меҳриниса Тўхтамишеванинг айтишича, кекса ёшдаги аҳоли узоқ масофага юра олмайди ва энди уйлари яқинида дам олиш имконига эга бўлади. Болалар учун эса ўйнайдиган жой пайдо бўлади.
Вугар Сулаймонов лойиҳани маҳалла учун яхши ташаббус деб атади ва унинг муаллифларига миннатдорлик билдирди.
