Тошкентда Ўзбекистон–Озарбайжон форуми ўтказилади

Тошкент, Ўзбекистон (UzDaily.uz) — 2026 йил 17 июль куни Тошкент шаҳрида Ўзбекистон Республикаси ва Озарбайжон Республикасининг IV Ҳудудлараро форуми бўлиб ўтади. Форум икки мамлакат ўртасида савдо-иқтисодий, инвестициявий ва ҳудудлараро ҳамкорликни янада ривожлантириш учун муҳим майдонга айланади.

Тадбирда Ўзбекистон ва Озарбайжоннинг давлат органлари вакиллари, инвесторлар ҳамда ишбилармон доиралар вакиллари иштирок этиши кутилмоқда.

Форумда агробизнес ва озиқ-овқат саноати, қурилиш ва қурилиш материаллари ишлаб чиқариш, машинасозлик, ахборот технологиялари ва рақамли ечимлар, логистика, соғлиқни сақлаш, энергетика, саноат ишлаб чиқариши, шунингдек, профессионал ва консалтинг хизматлари соҳаларида фаолият юритувчи Озарбайжоннинг етакчи компаниялари қатнашади.

Ташкилотчилар Озарбайжонлик ҳамкорлар билан ҳамкорликни ривожлантиришдан манфаатдор бўлган Ўзбекистон компанияларини форумда иштирок этишга, қўшма лойиҳаларни амалга ошириш истиқболлари ва ишбилармонлик алоқаларини кенгайтириш масалаларини муҳокама қилишга таклиф қилди.