Тошкент, Ўзбекистон (UzDaily.uz) — Тошкент вилояти ва Япониянинг Айти префектураси савдо-иқтисодий ҳамда инвестициявий ҳамкорликни кенгайтириш истиқболларини муҳокама қилди. Бу ҳақда Тошкент вилояти ҳокимлиги хабар берди.
Вилоят делегациясининг Японияга ташрифи доирасида Тошкент вилояти ҳокимининг ўринбосари Жаҳонгир Мамажонов Ўзбекистоннинг Нагоя шаҳридаги фахрий консули Хироюки Ито билан учрашди.
Томонлар ҳудудлараро алоқаларни ривожлантириш, Япония инвестицияларини жалб қилиш ва ишбилармонлик муносабатларини кенгайтириш имкониятларини кўриб чиқди.
Хироюки Ито Тошкент вилояти билан ҳамкорлик қилиш салоҳияти юқори эканини таъкидлаб, Нагоя шаҳри ва Айти префектурасидаги йирик ишбилармонлик федерациялари, иқтисодий бирлашмалар ҳамда савдо-саноат палатаси билан ҳамкорликни фаоллаштириш муҳимлигини қайд этди.
У мазкур ташкилотлар билан учрашувларни ташкил этишга кўмаклашиш ва вилоятда лойиҳаларни амалга оширишга қизиқиш билдирган Япония компанияларини жалб қилишга тайёрлигини билдирди.
Музокаралар давомида 2027 йил февраль ойида Япония компаниялари делегациясининг Тошкент вилоятига ташрифини ташкил этиш ва кенгайтирилган бизнес-форум ўтказиш таклиф қилинди.
Форум доирасида япон тадбиркорларига вилоятнинг инвестициявий салоҳияти, саноат зоналари ва истиқболли лойиҳаларини тақдим этиш режалаштирилган. Шунингдек, маҳаллий тадбиркорлар билан B2B учрашувларини ташкил этиш ва корхоналар фаолияти билан танишиш кўзда тутилган.
Томонлар ташаббусни амалий жиҳатдан ишлаб чиқишни бошлаш, ҳамкорликнинг устувор йўналишларини белгилаш ҳамда бўлажак ташрифда иштирок этиши мумкин бўлган Япония компаниялари рўйхатини шакллантиришга келишиб олди.
