Тошкент, Ўзбекистон (UzDaily.uz) — Қозоғистон Президенти Қосим-Жомарт Тўқаев Россиянинг Туркий давлатлар ташкилоти (ТДТ) фаолиятида иштирок этиши имкониятини кўриб чиқиш тарафдори бўлди. У Анқарада бўлиб ўтаётган бирлашманинг 13-саммити иштирокчиларига шундай таклиф билан мурожаат қилди.
Қозоғистон раҳбарининг фикрича, Москвага ташкилотга қўшилиш ёки кузатувчи мақомини олиш таклиф қилиниши мумкин. Тўқаев бундай қадам ТДТнинг халқаро нуфузини мустаҳкамлашга хизмат қилади, деб ҳисоблайди.
Ўз ташаббусини асослар экан, Қозоғистон Президенти Россиянинг туркий дунё билан тарихий ва маданий алоқаларига эътибор қаратди. Ушбу мамлакат ҳудудида кўплаб туркий халқлар вакиллари яшашини, улар билан ҳамкорлик асрлар давомида давом этиб келаётганини таъкидлади.
Тўқаев, шунингдек, Россиянинг «Олтой — туркий цивилизация бешиги» лойиҳасини тилга олди. Унинг айтишича, Қозоғистон ушбу лойиҳани қўллаб-қувватлайди. Бундан ташқари, у рус тилида туркий келиб чиқишга эга сўзлар мавжудлигига ҳам эътибор қаратди.
Шу билан бирга, Қозоғистон раҳбари Астананинг бирлашма хусусиятига доир позициясини ҳам эслатди.
Унинг сўзларига кўра, 2026 йил май ойида Туркистон шаҳрида бўлиб ўтган ТДТнинг норасмий саммитида у ташкилот ҳарбий иттифоқ эмаслигини ва келажакда ҳам бундай мақомга эга бўлмаслиги кераклигини таъкидлаган.
«Бу — Қозоғистоннинг позицияси», — деди Тўқаев.
