Тошкент, Ўзбекистон (UzDaily.uz) — Рақамли технологиялар вазирлигида ЮНEСКО ташаббуси билан “Ўзбекистонда сунъий интеллектга тайёрликни баҳолаш методологияси (RAM)” лойиҳаси бошқарув қўмитасининг йиғилиши ўтказилди.
Тадбирда Президент администрациясининг Молиявий технологиялар, рақамлаштириш ва сунъий интеллект бўйича департаментининг раҳбари Бобур Ходжаев, Рақамли технологиялар вазири биринчи ўринбосари Олег Пекос ва ЮНEСКОнинг Ўзбекистондаги вакили Сара Ношади нутқ сўзладилар.
Йиғилиш давомида лойиҳа доирасида амалга оширилаётган ишлар юзасидан маълумот берилди. Шунингдек, тадқиқотнинг ҳуқуқий, ижтимоий-маданий, илмий, иқтисодий ва технологик йўналишларда эришилган дастлабки натижалари тақдим этилди.
Учрашув якунида манфаатдор томонларни кенгроқ жалб этиш, лойиҳа тақвимини заруратга кўра мослаштириш, келгусида ўтказиладиган бошқарув қўмитасининг иккинчи йиғилиши ҳамда ЮНEСКО Бош конференцияси доирасидаги тадбирга тайёргарлик масалалари белгилаб олинди.
