Тошкент, Ўзбекистон (UzDaily.uz) — Грузия компаниялари делегацияси 29 октябрь куни мамлакатнинг технологик экотизими, IT соҳасида бизнес юритиш шартлари ва инвестиция имкониятлари билан танишиш мақсадида IT Park Uzbekistan’га ташриф буюрди.
Ташриф 2026 йил 28–29 октябрь кунлари Грузия делегациясининг Ўзбекистонга амалга оширган ишбилармонлик сафари доирасида ташкил этилди. Сафар икки мамлакат ўртасидаги савдо-иқтисодий ва инвестициявий алоқаларни кенгайтиришга қаратилган.
28 октябрь куни қурилиш, саноат, қишлоқ хўжалиги, транспорт ва логистика, ахборот технологиялари ҳамда бошқа соҳалардаги ҳамкорлик истиқболларига бағишланган Ўзбекистон–Грузия бизнес-форуми бўлиб ўтди. Дастурдан B2B ва B2G форматларидаги икки томонлама музокаралар ҳам ўрин олди.
Эртаси куни Грузия ишбилармон доиралари вакиллари мамлакатнинг инвестиция муҳити билан танишиш дастури доирасидаги майдонлардан бири — IT Park Uzbekistan’га ташриф буюрди.
Парк вакиллари унинг инфратузилмаси ва компанияларнинг Ўзбекистон бозорига кириши учун мавжуд имкониятлар ҳақида маълумот берди. Делегация, шунингдек, IT Park Uzbekistan резиденти мақомини олиш шартлари ва резидентлар учун амал қиладиган имтиёзлар билан танишди.
Учрашувда Ўзбекистон IT соҳасига инвестиция киритиш истиқболларига ҳам алоҳида эътибор қаратилди.
IT Park Uzbekistan’га ташриф Ўзбекистон ва Грузия ўртасидаги ишбилармонлик алоқаларини мустаҳкамлаш дастурининг бир қисми бўлди. Ушбу дастур иқтисодиётнинг анъанавий тармоқлари билан бир қаторда ахборот технологиялари соҳасини ҳам қамраб олди.
