Тошкент, Ўзбекистон (UzDaily.uz) — Суд инстанциялари Рақобат қўмитасининг «Худудгаз Бухоро» филиалига нисбатан қабул қилган, тадбиркорларга жами 547,9 млн сўмлик ҳисоб-китобларни қайта кўриб чиқиш мажбуриятини юклаган қарорининг қонунийлигини тасдиқлади. Бу ҳақда Ўзбекистон Рақобат қўмитаси хабар берди.
Қўмитанинг Бухоро вилояти ҳудудий бошқармаси «Ҳудудгазтаъминот» АЖ газ таъминоти филиали фаолиятида «Рақобат тўғрисида»ги қонуннинг 18-моддаси бузилганини аниқлади. Текширув товарларни сотиш ва сотиб олиш шартлари, шунингдек, хизматлар учун ҳақ ҳисоблаш жараёнларини қамраб олди.
Қўмита маълумотларига кўра, филиал товарларни сотиш ёки сотиб олишда камситувчи шартларни белгилаган ва истеъмолчиларга улардан фойдаланиш шартларини мажбуран юклаган. Бундан ташқари, амалда кўрсатилмаган ёки бепул тақдим этилиши лозим бўлган хизматлар учун ҳақ ҳисоблангани аниқланган.
Текширув натижаларига кўра, ҳудудий бошқарма тадбиркорларга ортиқча ҳисобланган маблағларни қайтариш ва тегишли суммаларни қайта ҳисоблаш бўйича кўрсатма берди. Ҳисобланган маблағларнинг умумий миқдори 547 млн 938 минг 880 сўмни ташкил этди.
Жумладан, қайта ҳисоб-китоб тўртта хўжалик юритувчи субъектга тааллуқли бўлди. «Бухоро озиқ-овқат» МЧЖ ҳиссасига 434,4 млн сўм, якка тартибдаги тадбиркор А. Насировга 10 млн 623,6 минг сўм, «Ситораи Моҳи Хоса» МЧЖга 72 млн 963,28 минг сўм, «Маҳмуд Абдулло Қурувчи» МЧЖга эса 29 млн 952 минг сўм тўғри келган.
Қўмита маълум қилишича, «Худудгаз Бухоро» филиали қайта ҳисоб-китобларни амалга ошириб, тегишли суммаларни чегириб ташлашни таъминлаган.
«Ҳудудгазтаъминот» АЖ ҳудудий бошқарма қароридан кассация ва тафтиш тартибида шикоят қилган. Суд компаниянинг важларини кўриб чиқди ва қўмита хабарига кўра, ҳудудий бошқарма қарорининг қонунийлиги ҳамда асосли эканини тасдиқлади.
