Тошкент, Ўзбекистон (UzDaily.uz) — Покистоннинг Mateen Group of Companies (MGC) компанияси Ўзбекистонда ўз компаниясини ташкил этиш ва IT-хизматларини халқаро бозорларга экспорт қилиш имкониятини кўриб чиқмоқда.
Ушбу масала IT Park Uzbekistan вакиллари томонидан MGC асосчиси, директорлар кенгаши раиси ва бош ижрочи директори доктор Муҳаммад Соҳайб Матин билан ўтказилган учрашувда муҳокама қилинди.
Учрашувда компаниянинг бизнес ҳамкорлик масалалари бўйича вакили Али Анвар Али ҳам иштирок этди.
IT Park Uzbekistan вакиллари делегацияга резидент мақомини олишнинг афзалликлари, IT Visa, Business Card ва Zero Risk дастурлари ҳақида маълумот бердилар. Шунингдек, меҳмонларга IT Park'нинг ҳудудий филиаллари, мавжуд офис бинолари ва инфратузилма имкониятлари тақдим этилди.
Компания фаолиятини Ўзбекистонда йўлга қўйиш учун мамлакатнинг турли ҳудудларида жойлашган бир нечта истиқболли майдонлар таклиф этилди.
Музокаралар якунида Муҳаммад Соҳайб Матин Ўзбекистонда компания ташкил этиш ва яқин вақт ичида IT-хизматлар экспортини йўлга қўйишдан манфаатдор эканини билдирди.
Хабарда компанияни очишнинг аниқ муддатлари, инвестициялар ҳажми ва режалаштирилаётган IT-хизматлар йўналишлари кўрсатилмаган.
