Тошкент, Ўзбекистон (UzDaily.uz) — IT Park Uzbekistan 4 ноябрь куни АҚШ Миллий манфаатлар маркази (CFTNI) ва Жонс Хопкинс университетининг Илғор халқаро тадқиқотлар мактаби (JHU SAIS) делегацияси билан учрашув ўтказди.
Томонлар Ўзбекистон технологик секторини ривожлантириш, IT-хизматлар экспорти ва хорижий инвесторларни жалб қилиш имкониятларини муҳокама қилдилар.
Музокараларда IT Park Uzbekistan стратегик ривожланиш бўйича директори Маҳлиё Муксинова ҳамда CFTNI катта эксперти, JHU SAIS профессори, АҚШ делегациясига раҳбарлик қилган Эндрю Качинс иштирок этди.
IT Park Uzbekistan вакиллари мамлакат технологик соҳасининг имкониятлари, кадрлар салоҳияти, солиқ имтиёзлари ва резидент компанияларни давлат томонидан қўллаб-қувватлаш чоралари ҳақида маълумот бердилар. IT-хизматлар экспорти, хорижий компанияларни жалб қилиш, стартаплар ва технологик инфратузилмани ривожлантириш масалаларига алоҳида эътибор қаратилди.
АҚШ делегациясига маҳаллий ва хорижий компаниялар учун махсус ҳуқуқий режимни жорий этиш, қулай солиқ ва тартибга солиш шароитларини яратишни назарда тутувчи Enterprise Uzbekistan лойиҳаси ҳам тақдим этилди.
Учрашув давомида АҚШ экспертлари IT Park резидентлари фаолияти, ўзбекистонлик мутахассисларнинг малакаси, асосий экспорт бозорлари ҳамда мамлакатнинг халқаро IT-бизнес учун рақобатбардош устунликлари билан қизиқдилар.
Томонлар Америка таҳлил марказлари ва соҳавий ташкилотлар билан ҳамкорлик қилиш истиқболларини ҳам кўриб чиқдилар.
Жумладан, Ўзбекистонда технологиялар соҳасининг ривожланишига бағишланган эксперт материалларини тайёрлаш ва мамлакатнинг инвестициявий имкониятлари ҳақидаги маълумотларни АҚШда тарқатиш масалалари муҳокама қилинди.
Музокаралар якунида иштирокчилар Ўзбекистонда амалга оширилаётган ислоҳотлар, мамлакатнинг технологик салоҳияти ва хорижий инвесторлар учун яратилган шароитлар ҳақида эксперт баҳолари ҳамда маълумотлар алмашинувини давом эттиришга келишиб олдилар.
