Тошкент, Ўзбекистон (UzDaily.uz) — IT Park Uzbekistan ва видео ўйинларнинг халқаро нашриётчиси ESDigital Games компьютер ўйинларини ишлаб чиқиш ва илгари суриш соҳасида ҳамкорлик истиқболларини муҳокама қилди. Компания вакиллари билан учрашув Ўзбекистонда бўлиб ўтди.
Музокараларда IT Park Uzbekistan Экспортни ривожлантириш бошқармаси раҳбари Азамат Раҳмон-Зода ва ESDigital Games бошқарув директори Олег Кудишов иштирок этди.
IT Park вакиллари мамлакатдаги GameDev саноатининг ҳолати, резидентликнинг афзалликлари ҳамда маҳаллий мутахассисларнинг кадрлар салоҳияти ҳақида маълумот берди. Компания маълумотларига кўра, ESDigital Games ўйин индустриясида 30 йилдан ортиқ иш тажрибасига эга.
Томонлар асосий эътиборни Ўзбекистондаги ўйин студияларини қўллаб-қувватлаш ва мамлакатда ишлаб чиқилган лойиҳаларни халқаро бозорларда илгари суриш имкониятларига қаратди.
Шунингдек, видео ўйинлар ишлаб чиқиш бўйича минтақавий экотизимни мустаҳкамлашга қаратилган қўшма ташаббуслар ҳам муҳокама қилинди.
Учрашув якунлари бўйича аниқ лойиҳалар, келишувларни амалга ошириш муддатлари ва эҳтимолий инвестициялар ҳажми ҳақида маълумот берилмаган.
