Тошкент, Ўзбекистон (UzDaily.uz) — Жиззах вилоятининг Зарбдор туманида болалар боғчаси мудираси ўлдирилди. Дастлабки маълумотларга кўра, жиноятга унинг турмуш ўртоғининг алоқадорлиги гумон қилинмоқда.
Бош прокуратура матбуот хизмати хабар беришича, 29 октябрь куни мазкур ҳолат юзасидан Ўзбекистон Жиноят кодексининг қасддан одам ўлдириш учун жавобгарликни назарда тутувчи 97-моддаси 1-қисми билан жиноят иши қўзғатилган.
Марҳума «Янги Ҳаёт» маҳалласида яшаган ва «Адиробод» маҳалласида жойлашган болалар боғчасига раҳбарлик қилган.
Ҳодисага оилавий низо сабаб бўлган бўлиши мумкин. Айни пайтда ҳуқуқни муҳофаза қилувчи органлар жиноят тафсилотларини, жумладан, у қандай содир этилганини ошкор қилмаяпти.
Марҳуманинг турмуш ўртоғи жиноятга алоқадор бўлиши мумкинлиги ҳақидаги маълумот дастлабки тусга эга. Терговнинг расмий натижалари ҳозирча маълум қилинмаган.
