Тошкент, Ўзбекистон (UzDaily.uz) — zЎзбекистон Йўл ҳаракати хавфсизлиги хизмати ижтимоий тармоқларда 1 январдан бошлаб экологик стикер йўқлиги учун 10 базавий ҳисоблаш миқдори (БҲМ) миқдорида жарима жорий этилиши, шунингдек, уни олиш пуллик бўлиши ҳақида тарқалаётган хабарларни рад этди.
ЙҲХХ бундай чораларни қўллаш учун ҳуқуқий асослар мавжуд эмаслигини таъкидлаб, фуқароларни ваколатли давлат органларининг расмий манбаларида эълон қилинган маълумотларга таянишга чақирди.
Ўзбекистонда «Экологик транспорт» тизими амал қилади. Унга кўра, автомобиллар атроф-муҳитга таъсир даражасига қараб яшил, сариқ ва қизил тоифаларга ажратилади.
Тегишли стикерни My.gov.uz портали ёки ЙҲХХнинг рўйхатдан ўтказиш бўлинмалари орқали олиш мумкин. Стикерни биринчи марта бериш, шунингдек, йилига бир марта такроран олиш бепул амалга оширилади.
Экологик стикер муддатсиз берилади, шунинг учун уни ҳар йили алмаштириш талаб этилмайди. Шу билан бирга, сариқ ва қизил тоифага киритилган автомобиллар эгалари юқорироқ экологик тоифани олиш учун йилига бир марта бепул қайта диагностикадан ўтишлари мумкин.
Экологик стикерларни бериш қоидалари Ўзбекистон Вазирлар Маҳкамасининг 2025 йил 28 ноябрдаги 750-сон қарори билан белгиланган.
ЙҲХХ ҳайдовчиларга ўз транспорт воситаларининг экологик тоифасини аниқлаш ва тегишли стикерни расмийлаштиришни тавсия қилди.
