Тошкент, Ўзбекистон (UzDaily.uz) — Бизнесга буюртмалар ва етказиб бериш жараёнларини бошқариш учун B2B SaaS платформасини ишлаб чиқувчи Ўзбекистоннинг Delever стартапи 380 минг доллар инвестиция жалб қилди. Инвестиция раундига 300 минг доллар киритган AloqaVentures венчур фонди раҳбарлик қилди. Қолган 80 минг доллар эса Nexus Club томонидан инвестиция қилинди.
AloqaVentures учун бу компанияга киритилган такрорий инвестиция ҳисобланади: фонд Delever’га биринчи марта 2024 йилда сармоя киритган. AloqaVentures ва Nexus Angel Club ҳамкори Даврон Пармановнинг таъкидлашича, pre-seed босқичида фонд 100 минг доллар инвестиция қилган. Унинг сўзларига кўра, жамоа қисқа вақт ичида зарарсизлик нуқтасига етган ва етти мамлакатда ўсишни намойиш этган.
Ҳозирда фонд қўшимча (follow-on) инвестициялар ажратмоқда. Пармановнинг қайд этишича, компания ушбу бозорларни эгаллаш ва фаол суръатларда кенгайишни режалаштирмоқда. «Жамоа кучли: улар маҳсулот яратишни ҳам, уни сотишни ҳам билади», — деди у.
Delever етказиб бериш хизматига эга бизнеслар учун зарур воситаларни ягона тизимда бирлаштиради. У барча савдо каналларидан буюртмаларни қабул қилиш, агрегаторлар билан интеграция, касса тизимлари, етказиб бериш жараёни ва курьерларни бошқариш имкониятларини тақдим этади. Ҳозирда платформадан етти мамлакатда, асосан Ўзбекистон ва Қозоғистондаги 1 400 дан ортиқ ресторан ва дўкон фойдаланмоқда.
Жалб қилинган маблағлар компания томонидан маҳсулотни ривожлантириш, унинг имкониятларини кенгайтириш ва янги бозорларга чиқиш учун йўналтирилади. Delever ҳаммуассиси ва бош директори Фахриддин Юсуповнинг таъкидлашича, етказиб бериш хизматига эга ресторанга бир-биридан ажралган ўнлаб сервислар эмас, балки ягона тизим керак. Унинг сўзларига кўра, AloqaVentures’нинг такрорий инвестицияси компания учун маблағ миқдоридан ҳам муҳимроқ: фонд компания фаолиятини ичидан кўрган ва яна сармоя киритишга қарор қилган.
Delever ўзини етказиб бериш хизматига эга ресторанлар ва чакана савдо корхоналари учун операцион тизим сифатида тақдим этади. У савдо каналлари, буюртмалар, агрегаторлар ва етказиб бериш жараёнларини ягона интерфейсда бирлаштиради. Компания IT Park Uzbekistan резиденти ва Astana Hub иштирокчиси ҳисобланади. Delever Ltd. эса Қозоғистондаги Молия марказида (МФЦА) рўйхатдан ўтган.
