Тошкент, Ўзбекистон (UzDaily.uz) — Ўзбекистон рақамли технологиялар вазири Шерзод Шерматов ва VEON бош ижрочи директори Каан Терзиоглу мамлакат телекоммуникация инфратузилмасини ривожлантириш истиқболларини муҳокама қилди. Бу ҳақда Ўзбекистон Республикаси Рақамли технологиялар вазирлиги хабар берди.
Учрашув Марказий Осиё давлатлари ва АҚШ иштирокидаги C5+1 саммити доирасида Самарқанд шаҳрида бўлиб ўтди.
Музокараларнинг асосий мавзуларидан бири мобил алоқа тармоқлари қамровини кенгайтириш ва аҳоли учун рақамли хизматлар сифатини ошириш бўлди. Шунингдек, иштирокчилар Ўзбекистонда рақамли хизматларга бўлган талаб ортиб бораётганини ҳисобга олган ҳолда интернетдан фойдаланиш имкониятларини янада кенгайтириш масалаларини кўриб чиқди.
Томонлар VEON гуруҳининг халқаро тажрибаси ва унинг Ўзбекистон бозоридаги фаолияти юзасидан фикр алмашди. Замонавий технологик ечимларни жорий этиш ҳамда телекоммуникация инфратузилмасини ривожлантириш истиқболларига алоҳида эътибор қаратилди.
Учрашув якунида Ўзбекистон ва VEON вакиллари келгусидаги ҳамкорликнинг эҳтимолий йўналишларини кўриб чиқиб, алоқа ва рақамли хизматларни ривожлантириш масалалари бўйича мулоқотни давом эттиришга келишиб олди.
