Тошкент, Ўзбекистон (UzDaily.uz) — Ўзбекистонда октябрь ойида суюлтирилган газни ноқонуний сақлаш ва сотиш билан боғлиқ 374 та ҳолат, шунингдек, кўмир маҳсулотларига оид 16 та қоидабузарлик аниқланди.
Текширувлар натижасида ноқонуний муомаладан 9 139 та газ баллони, 92,9 тонна суюлтирилган газ ва 333,54 тонна кўмир мусодара қилинди. Бу ҳақда Ички ишлар вазирлиги матбуот хизмати хабар берди.
Ички ишлар вазири Азиз Ташпўлатов аҳоли ва ижтимоий объектларни кўмир, табиий ва суюлтирилган газ билан узлуксиз таъминлаш, шунингдек, ёқилғини тақсимлаш жараёнида коррупция ва талон-торож ҳолатларининг олдини олиш масалаларига бағишланган йиғилиш ўтказди.
Вазирлик маълумотларига кўра, мусодара қилинган кўмир кейинчалик аҳоли эҳтиёжлари учун йўналтирилган. Газ баллонлари ва суюлтирилган газни истеъмолчиларга қайтариш бўйича чоралар кўрилган. Ички ишлар вазирлиги аниқланган айрим ҳолатларда газ таъминоти корхоналари ходимлари ҳам талон-торожларга алоқадор бўлганини қайд этди.
Йиғилишда газ баллонларини белгиланган жадвал асосида етказиб бериш, ёқилғини ташиш ва тақсимлаш жараёнида шаффоф ҳисоб юритиш, шунингдек, истеъмолчилардан асоссиз тўловлар ундирилишига йўл қўймаслик вазифалари белгиланди.
Шунингдек, кўмир ва газ етказиб беришнинг ҳақиқий ҳажмлари билан ҳисобот маълумотлари ўртасидаги тафовутларни, ёқилғини тўлиқ етказиб бермаслик ҳолатларини ҳамда мансаб ваколатларини суиистеъмол қилишни аниқлаш бўйича тезкор-профилактик тадбирларни кучайтириш режалаштирилмоқда.
Ички ишлар вазирлиги «Ҳудудгазтаъминот» компанияси ва Транспорт вазирлиги билан биргаликда ташиш логистикаси, белгиланган йўналишларга риоя этилиши ва ҳаракат хавфсизлиги устидан назоратни кучайтиради. Газ тўлдириш шохобчалари, омборлар ва тақсимлаш базаларида қўшимча қўриқлаш чоралари кўрилади.
Аҳолини суюлтирилган газ билан таъминлашдаги муаммолар сентябрь ойи бошида Президент Шавкат Мирзиёев раислигида ўтказилган йиғилишда ҳам муҳокама қилинган эди. Ўшанда ушбу турдаги ёқилғи билан қарийб 3,8 млн истеъмолчи ва 2 мингга яқин ижтимоий объект таъминланаётгани маълум қилинган. 2026 йилда улар учун 604,8 минг тонна суюлтирилган газ етказиб бериш кўзда тутилган.
Текширувлар натижаларига кўра, истеъмолчиларнинг 22 фоизи газ баллонларини 46 кундан ортиқ интервал билан олаётгани аниқланган. Етказиб беришдаги кечикишлар туфайли айрим оилалар ёқилғини бозор нархларида автомобиль газ қуйиш шохобчаларидан сотиб олишга мажбур бўлмоқда.
Етказиб бериш тизимини яхшилаш мақсадида аввалроқ хусусий операторларни жалб этган ҳолда пилот лойиҳани амалга ошириш режаси эълон қилинган эди.
Бундан ташқари, «Ҳудудгазтаъминот» ҳузурида LPG-Trade шўъба компанияси ташкил этилмоқда. У биржа орқали суюлтирилган газ харид қилиш ва уни аҳолига етказиб беришни ташкил этиш билан шуғулланади.
