Тошкент, Ўзбекистон (UzDaily.uz) — Ўзбекистон ва Озарбайжон рақамли трансформация, IT соҳасини ривожлантириш ҳамда киберхавфсизликни таъминлаш йўналишларида ҳамкорликни кенгайтириш истиқболларини муҳокама қилди.
Музокаралар Боку шаҳрида UN Governance Innovation Summit халқаро саммити доирасида бўлиб ўтди. Бу ҳақда Ўзбекистон Рақамли технологиялар вазирлиги хабар берди.
Ўзбекистон делегациясига рақамли технологиялар вазирининг биринчи ўринбосари Аюбхон Султонов раҳбарлик қилди. Озарбайжон томонидан учрашувда рақамли ривожланиш ва транспорт вазири ўринбосари Рашад Ҳасанов бошчилигидаги вазирлик вакиллари иштирок этди.
Томонлар давлат бошқарувини рақамлаштириш, электрон давлат хизматларини кенгайтириш ва стартаплар экотизимини шакллантириш соҳаларида ҳамкорлик қилиш имкониятларини кўриб чиқди. Икки мамлакат IT-компанияларининг экспорт салоҳиятини ошириш масаласига алоҳида эътибор қаратилди.
Учрашув иштирокчилари, шунингдек, ахборот-коммуникация технологиялари бозорини ривожлантириш, IT мутахассислари учун юқори малакали иш ўринларини яратиш ҳамда сунъий интеллектнинг соҳа трансформациясига таъсирини муҳокама қилди.
Музокараларнинг яна бир мавзуси муҳим ахборот инфратузилмасини ҳимоя қилиш бўлди. Икки мамлакат вакиллари киберхавфсизлик ҳамда ахборот тизимларини муҳофаза қилишда замонавий технологияларни жорий этиш масалалари юзасидан фикр алмашди.
Учрашув якунида томонлар амалий ҳамкорликни янада ривожлантириш, тажриба алмашиш ва рақамли ривожланиш соҳасида қўшма ташаббусларни амалга оширишдан манфаатдор эканини тасдиқлади.
