Тошкент, Ўзбекистон (UzDaily.uz) — Ўзбекистон ва Туркия туризм соҳасидаги ҳамкорликни кенгайтириш, хорижий сайёҳларни жалб қилиш ҳамда қўшма инвестиция лойиҳаларини амалга ошириш масалаларини муҳокама қилди.
Ўзбекистон Туризм қўмитаси раиси Абдулазиз Аккулов Истанбулга ишчи ташрифи доирасида World Halal Summit Council, Pegasus Airlines авиакомпанияси ва Истанбул савдо палатаси вакиллари билан музокаралар ўтказди. Бу ҳақда Ўзбекистон Туризм қўмитаси хабар берди.
World Halal Summit Council президенти Юнус Эте билан учрашувда Ўзбекистонни халқаро зиёрат туризми ва мусулмонлар учун қулай (Muslim-friendly) туризм йўналиши сифатида тарғиб қилиш масалалари муҳокама қилинди.
Томонлар 2027 йилда мамлакатда World Halal Summit халқаро саммити ва унга ҳамроҳ форумларни ўтказиш, шунингдек, халқаро журнал нашр этиш имкониятларини кўриб чиқди.
Бундан ташқари, Туризм қўмитаси ҳузуридаги Туристик маҳсулотларни ривожлантириш бўйича лойиҳа офиси билан ҳамкорликда Бухоро ва Ўзбекистоннинг бошқа шаҳарларида йирик халқаро тадбирларни ташкил этиш масалалари муҳокама қилинди.
Pegasus Airlines директорлар кенгаши раиси Меҳмет Тевфик Нане билан учрашувда авиакомпаниянинг йўналишлар тармоғидаги шаҳарларда Ўзбекистоннинг туристик салоҳиятини тарғиб қилиш масалалари кўриб чиқилди. Дастлабки келишувга кўра, Pegasus Airlines авиакомпаниясининг Ўзбекистондаги бешта шаҳарга амалга оширадиган рейсларига сайёҳларни жалб қилиш мақсадида қўшма реклама кампаниясини ўтказишни назарда тутувчи келишув лойиҳасини тайёрлашга келишилди.
Шунингдек, миллий авиакомпаниялар томонидан Ўзбекистон билан тўғридан-тўғри авиақатновлар йўлга қўйилмаган авиакомпания йўналишларида мамлакатни тарғиб қилиш масаласи ҳам муҳокама қилинди. Pegasus Airlines авиакомпаниясининг Истанбулдаги Сабиха Гўкчен аэропорти орқали амалга ошириладиган йўналишлар тармоғи 58 та мамлакатдаги 100 дан ортиқ йўналишни қамраб олади.
Томонлар ўзбекистонлик туроператорлар билан ҳамкорликни йўлга қўйиш, қўшма маркетинг кампанияларини ўтказиш, авиакомпания тақдимотлари ва 2026 йилги Тошкент халқаро туристик ярмаркаси (ТМТЯ–2026) доирасида B2B учрашувларини ташкил этиш, шунингдек, танишув сафарларини уюштиришни таклиф қилди.
Истанбул савдо палатаси президенти Шекиб Авдағич билан музокараларда ишбилармонлик алоқаларини фаоллаштириш ва Туркиянинг халқаро меҳмонхона брендларини Ўзбекистонга жалб қилиш масалалари муҳокама қилинди. Бундан ташқари, томонлар палата таркибига кирувчи Convention Bureau иштирокида қўшма тадбирлар ўтказиш имкониятини кўриб чиқишга дастлабки келишувга эришди.
Туркия вакиллари 2026 йил 25–27 ноябрь кунлари бўлиб ўтадиган 31-Тошкент халқаро «Ипак йўлида туризм» туристик ярмаркасига таклиф қилинди. Ярмарка доирасида биринчи халқаро туристик инвестиция форумини ҳам ўтказиш режалаштирилган.
