Тошкент, Ўзбекистон (UzDaily.uz) — Ўзбекистон Туризм қўмитаси раисининг ўринбосари Сухробжон Бобокалонов Швейцариянинг SHL Schweizerische Hotelfachschule Luzern меҳмонхоначилик мактаби вакили Мартин Барф билан учрашди. Томонлар туризм соҳаси учун мутахассислар тайёрлаш борасидаги ҳамкорлик масалаларини муҳокама қилди.
Учрашувда туризм соҳаси ходимлари ва ўқитувчиларининг касбий билим ҳамда кўникмаларини халқаро стандартларни ҳисобга олган ҳолда оширишга асосий эътибор қаратилди.
Музокара иштирокчилари, шунингдек, Швейцария экспертларини жалб этган ҳолда Ўзбекистонда таълим дастурларини ташкил этиш бўйича таклифларни кўриб чиқди. Бундан ташқари, ўзбекистонлик мутахассисларнинг хорижда малака ошириш амалиётларида иштирок этиш имкониятлари муҳокама қилинди.
Ҳамкорлик Ўзбекистон туризм соҳаси учун кадрлар тайёрлаш сифатини ошириш ва таълим жараёнларига илғор халқаро тажрибани жорий этишга қаратилган.
