Тошкент, Ўзбекистон (UzDaily.uz) — Ўзбекистон ва Абу-Даби қишлоқ хўжалиги ҳамда озиқ-овқат хавфсизлиги соҳаларидаги ҳамкорликни ривожлантириш, шунингдек, ўзбек маҳсулотларининг БАА бозорига етказиб берилишини кенгайтириш мақсадида қўшма ишчи гуруҳ тузишга келишиб олди.
Бу келишув Ўзбекистон элчиси Умид Шадиевнинг Абу-Даби Қишлоқ хўжалиги ва озиқ-овқат хавфсизлиги бошқармаси (ADAFSA) раҳбарияти билан учрашувида эришилди. Бу ҳақда «Дунё» ахборот агентлиги мухбири хабар берди.
Музокаралар давомида томонлар агросаноат мажмуасига инвестицияларни жалб қилиш, қишлоқ хўжалиги маҳсулотларини чуқур қайта ишлашни ривожлантириш ва уларнинг Бирлашган Араб Амирликларига экспортини ошириш масалаларини муҳокама қилди.
Ўзбекистон томони амирликлик ҳамкорларга қишлоқ хўжалигини модернизация қилиш, замонавий агросаноат кластерларини ташкил этиш, маҳсулотларни сақлаш ва қайта ишлаш инфратузилмасини ривожлантиришга қаратилган ислоҳотлар ҳақида маълумот берди.
Шунингдек, озиқ-овқат маҳсулотлари сифати ва хавфсизлигининг халқаро стандартларини жорий этиш, экспортга йўналтирилган маҳсулотлар ишлаб чиқариш ҳажмини ошириш ҳамда логистика тизимини такомиллаштиришга алоҳида эътибор қаратилди.
Учрашув доирасида истиқболли инвестиция лойиҳалари, жумладан, замонавий Surxon Agro агросаноат кластерини ташкил этиш лойиҳаси ҳам тақдим этилди.
ADAFSA ва Ўзбекистон Инвестициялар, саноат ва савдо вазирлиги мутахассислари иштирокида ташкил этиладиган ишчи гуруҳ БАА бозорида талаб юқори бўлган Ўзбекистон қишлоқ хўжалиги ва озиқ-овқат маҳсулотлари турларини аниқлаш билан шуғулланади.
Ишчи гуруҳ аъзолари маҳсулотларни етказиб беришнинг эҳтимолий ҳажмлари, уларга қўйиладиган талаблар ва амирлик бозорига кириш шартларини ўрганади. Шунингдек, муқобил транспорт-логистика йўналишларини ишлаб чиқади.
Бундан ташқари, ADAFSA кўмагида агросаноат ва озиқ-овқат соҳаларида фаолият юритувчи етакчи амирлик компаниялари вакилларидан иборат делегациянинг Ўзбекистонга ташрифини ташкил этиш режалаштирилмоқда.
