Ўзбекистон ҳокимликлари мажбурий меҳнатга қарши огоҳлантирмоқда

Тошкент, Ўзбекистон (UzDaily.uz) — Ўзбекистон ҳокимликлари мажбурий меҳнатга йўл қўймаслик ҳақида огоҳлантирилди / Фото: Сунъий интеллект ёрдамида яратилган тасвир.

Меҳнат давлат инспекцияси Қорақалпоғистон Республикаси Вазирлар Кенгаши, вилоятлар, Тошкент шаҳри, шунингдек, туман ва шаҳар ҳокимликларига мажбурий меҳнатга йўл қўйилмаслиги ҳақида расмий огоҳлантириш хатларини юборди.

Вазирликда таъкидланишича, ходимларнинг розилигисиз, таҳдид ёки босим остида уларни белгиланган иш вақти давомийлигидан ташқари, шунингдек, дам олиш ва байрам кунларида ишлашга жалб қилиш мумкин эмас.

Огоҳлантириш меҳнат қонунчилиги бузилишининг олдини олиш ва ходимларнинг ҳуқуқларини ҳимоя қилишга қаратилган.

Меҳнат давлат инспекцияси маълумотларига кўра, жорий йилнинг саккиз ойи давомида мажбурий меҳнат ҳолатларига йўл қўйилгани билан боғлиқ ҳолда ҳокимликларнинг уч нафар мансабдор шахси маъмурий жавобгарликка тортилган.

Инспекцияда маълум қилинишича, мажбурий меҳнат билан боғлиқ аниқланган барча қоидабузарликлар қонунчиликда белгиланган тартибда кўриб чиқилади. Айбдор деб топилган шахсларга нисбатан қатъий чоралар кўрилади.

Мажбурий меҳнатга дуч келган ёки бундай ҳолатлар ҳақида маълумотга эга бўлган фуқароларга Меҳнат давлат инспекциясига мурожаат қилиш тавсия этилди.

Бундай ҳолатлар ҳақида @munosibmehnat_bot Telegram-боти орқали, +998 71 200-06-00 ишонч телефони ёки 1176 қисқа рақами орқали хабар бериш мумкин.