Тошкентда School Bus тизимини жорий этиш имконияти ўрганилмоқда

Тошкент, Ўзбекистон (UzDaily.uz) — Тошкентда ўқувчиларнинг пойтахт мактабларига янада хавфсиз ва қулай қатновини ташкил этишга қаратилган School Bus мактаб автобуслари тизимини жорий этиш имкониятлари амалий жиҳатдан ўрганила бошланди. Бу ҳақда Тошкент шаҳри Йўл ҳаракатини ташкил этиш маркази хабар берди.

Дастлабки босқичда мутахассислар ота-оналарнинг эҳтиёжларини ўрганмоқда, ўқувчилар ҳозирда таълим муассасаларига қандай етиб боришини аниқламоқда ҳамда кейинчалик автобус йўналишларини шакллантириш учун маълумотлар тўпламоқда.

Айни пайтда сўровнома Тошкентдаги 328 та мактабдан 29 тасида ўтказилди. Биринчи навбатда ўқувчилар сони энг кўп бўлган ва махсус мактаб транспортига талаб юқори бўлиши тахмин қилинган таълим муассасалари қамраб олинди. Тадқиқотда 58 369 нафар мактаб ўқувчисининг оила аъзолари ёки васийлари иштирок этди.

Дастлабки натижаларга кўра, ўқувчиларнинг 38,5 фоизи мактабга пиёда боради. Яна 33,1 фоизини ота-оналари шахсий автомобилларда олиб боради. Ўқувчиларнинг 18,3 фоизи автобусдан, 5,7 фоизи таксидан, 3,5 фоизи метродан фойдаланади. Яна 0,9 фоиз ўқувчи микромобиллик воситаларидан фойдаланади.

Шу билан бирга, сўров иштирокчиларининг 73,5 фоизи мактаблар учун махсус автобус қатновлари бўлишини хоҳлашини билдирган. Тошкент ЙҲТТМда таъкидланишича, олинган натижалар School Bus тизимига потенциал талаб юқори эканини кўрсатмоқда.

Сўровномани пойтахтдаги қолган мактабларда ҳам босқичма-босқич давом эттириш режалаштирилган. Тадқиқот якунланганидан сўнг мутахассислар ўқувчиларнинг йўловчи оқимини таҳлил қилиш, талаб юқори бўлган йўналишларни, зарур автобуслар сони ва уларнинг ҳаракат жадвалини аниқлашни режалаштирмоқда.

Шунингдек, болаларни хавфсиз чиқариш ва тушириш учун жойларни ташкил этиш масалалари ҳамда бўлажак тизимнинг бошқа ташкилий жиҳатлари ўрганилади.

Таҳлил натижаларига кўра, School Bus тизимини ишга туширишнинг амалий имкониятлари баҳоланади. Шундан сўнг тегишли ташкилотлар билан ҳамкорликда тизимни Тошкентда босқичма-босқич жорий этиш масаласини кўриб чиқиш режалаштирилган.

Ота-оналар сўровномада Telegram-бот орқали иштирок этишга чақирилди: @school_coddbot. Олинган жавоблар мактаб автобусларидан фойдаланиши мумкин бўлган фойдаланувчилар сонини, зарур транспорт воситалари ва йўналишлар миқдорини аниқлашга ёрдам бериши керак.